Vrasja e biznesmenit Ardian Nikulaj, Prokuroria e Lezhës kërkon burgim të përjetshëm për portugezin

Pas rreth dy vitesh proces gjyqësor në Gjykatën e Lezhës, Prokuroria ka dhënë këtë të martë pretencën për Ruben Saraiva, shtetas portugez, i akuzuar si ekzekutori i biznesmenit Ardian Nikulaj, duke kërkuar burgim të përjetshëm për të.

Seanca gjyqësore zgjati rreth një orë, gjatë së cilës organi i akuzës kërkoi dënimin më të lartë për Saraivën. Sipas Prokurorisë, ai është autor i vrasjes së ndodhur në prill të vitit 2023 në Shëngjin, një krim që tronditi opinionin publik.

Saraiva akuzohet për veprat penale “Vrasje e kryer për interes ose hakmarrje” dhe “Mbajtja pa leje dhe prodhimi i armëve, armëve shpërthyese dhe municionit”. Ngjarja ndodhi brenda ambienteve të një lokali në Shëngjin, ku biznesmeni Ardian Nikulaj u qëllua për vdekje. Sipas akuzës, krimi ishte i organizuar dhe i planifikuar, ndërsa roli i Saraivës konsiderohet kyç në ekzekutimin e tij.

Gjatë seancave të mëparshme janë paraqitur prova, dëshmi dhe ekspertiza që, sipas Prokurorisë, faktojnë përfshirjen e të pandehurit në këtë ngjarje të rëndë. Prokuroria ka kërkuar që gjykata të shqiptojë masën më të lartë të mundshme, duke e konsideruar rastin si një vepër penale me rrezikshmëri të lartë shoqërore.