Ministri i Jashtëm Hoxha telefonatë me homologun e tij në Kuvajt: Dënojmë veprimet e Iranit

Ministri i Jashtëm i Shqipërisë, Ferit Hoxha, zhvilloi një bisedë telefonike me homologun e tij të Kuvajtit, Sheikh Jarrah Jaber Al-Ahmad Al-Sabah, lidhur me përshkallëzimin e tensioneve në Lindjen e Mesme, pas sulmeve të Iranit ndaj vendeve të Gjirit.

Në një postim në rrjetin social X, Hoxha theksoi se Shqipëria dënon veprimet e Iranit, duke i cilësuar si shkelje të qarta të së drejtës ndërkombëtare dhe kërcënim për sovranitetin, sigurinë dhe ekonominë e Kuvajtit, si dhe për stabilitetin rajonal dhe global.

“Shqipëria qëndron në solidaritet të plotë me Kuvajt përballë çdo veprimi destabilizues. Mbështesim sovranitetin dhe integritetin territorial të vendit,” shkroi ministri Hoxha.

Ai njoftoi gjithashtu se Shqipëria do të bashkësponsorizojë projekt-rezolutën e OKB-së në Këshillin e Sigurimit, të paraqitur nga shtetet e Këshillit të Bashkëpunimit të Gjirit, e cila dënon sulmet e Iranit ndaj Bahreinit, Kuvajtit, Omanit, Katarit, Arabisë Saudite, Emirateve të Bashkuara Arabe dhe Jordanisë, dhe kërkon ndërprerjen e menjëhershme të tyre.

Në fund të komunikimit, Hoxha shprehu mirënjohjen e Shqipërisë për kujdesin e autoriteteve kuvajtiane ndaj qytetarëve shqiptarë gjatë këtyre ditëve të tensionuara.