Qarkullonte me armë zjarri në automjet, arrestohet 41-vjeçari në Tiranë (EMRI)

Policia e Tiranës, mbrëmjen e djeshme në rrugën “Selitë e Vogël”, ka arrestuar një 41-vjeçar, i cili qarkullonte me armë zjarri në automjet. Në kuadër të operacionit të koduar, është vënë në pranga shtetasi Luan Shabani, banues në Tiranë.

Sipas raportimeve të policisë, 41-vjeçari kishte fshehur armën në një hapësirë të improvizuar pranë dorezës së derës së drejtuesit të automjetit.

“Si rezultat i kontrolleve nga shërbimet e Forcës së Posaçme “Shqiponja”, të kryera 24/7 dhe në bazë të informacioneve të siguruara në rrugë operative, me objektiv ndalimin e shtetasve që posedojnë sende të kundërligjshme, u finalizua operacioni i koduar “Doreza”.

Nga kontrolli në automjetin me të cilin ky shtetas, të ndaluar gjatë natës, në rrugën “Selitë e Vogël”, u gjet 1 armë zjarri (pistoletë) me krehër dhe fishekë, e fshehur në një hapësirë të improvizuar nga i arrestuarit, në afërsi të dorezës së derës së drejtuesit të automjetit”, thuhet në njoftimin e policisë.

Materialet procedurale iu referuan Prokurorisë së Tiranës, për veprime të mëtejshme.