Ministri i Jashtëm kinez telefonatë me homologun iranian: Shpejtoni bisedimet për paqe

Ministri i Jashtëm i Kinës, Wang Yi, u ka bërë thirrje palëve që të shfrytëzojnë çdo mundësi për të nisur sa më shpejt bisedimet për paqe, gjatë një telefonate me homologun e tij iranian, Abbas Araghchi, sipas një deklarate të Ministrisë së Jashtme kineze.

“Të bisedosh është gjithmonë më mirë sesa të luftosh,” i tha Wang homologut të tij, duke shtuar se “të gjitha çështjet e nxehta duhet të zgjidhen përmes dialogut dhe negociatave, jo me përdorimin e forcës”.

Nga ana e tij, Araghchi theksoi se “Irani është i përkushtuar për t’i dhënë fund të plotë konfliktit, dhe jo thjesht për një armëpushim të përkohshëm”, ndërsa falënderoi Kinën për ndihmën humanitare, thuhet në deklaratë.

Sipas ministrisë, telefonata u zhvillua “me kërkesë” të palës iraniane.

Kina mbetet një partner kyç i Iranit, por ka theksuar se “nuk pajtohet” me sulmet e Teheranit ndaj shteteve të Gjirit që strehojnë baza amerikane, duke bërë gjithashtu thirrje për armëpushim.