Paketa e Maleve, Ervin Demo: Rreth 500 aplikime, nisma ka qëllim zhvillimin ekonomik lokal

Ervin Demo, ministër i Shtetit për Pushtetin Vendor, në një komunikim me mediat ka folur mbi “Paketën e Maleve”, të cilën ai e cilëson si një nismë që shpreh interes për bashkitë, dhe sjell zhvillim ekonomik lokal.

Ai thekson se disa bashki janë në fazën përfundimtare të miratimit të kërkesave nga qytetarët.

“Vazhduam përsëri me Paketën e Maleve. Sot kishim tre bashki të tjera: Pukë, Bulqizë dhe Lezhë. Numri i interesimeve në territor është afro 500. Ka disa bashki në fazën përfundimtare të miratimit të kërkesave nga qytetarët.

Bashkitë së shpejti mbarojnë afatin 45 ditor për të shpallur kandidatët, që më pas do kalojnë për miratim në Këshillin Bashkiak. Paketa e Maleve është një nismë prioritare për zhvillimin e territorit sidomos për bashkitë në vend.

Shprehja e interesit tregon nevojën e nismës për të krijuar zhvillim ekonomik lokal”, tha Demo.

I pyetur nëse qeveria ka planifikuar një impakt të drejtpërdrejtë, si do të përkthehet kjo për benefitet në zonat ku aplikohet, Demo thekson se aplikimet janë të bazuara brenda zonave prioritare që tashmë janë të shpallura.

“Nëse i referohemi objektivit që brenda vitit 2026 do kemi 1 mijë aplikime, flasim për dhjetëra milionë euro investime që qytetarët do realizojnë në territor që do kenë impakt ekonomik të konsiderueshëm.

Vlera fillestare për këto 1 mijë aplikime besoj se do jetë 50 milionë euro investim në zonat që kanë prioritet zhvillimin e turizmit, të gjykuar nga vetë bashkitë”, u shpreh Ervin Demo.