Berisha takim me raportuesit e Këshillit të Europës: Shqipëria ka bërë kthimin mbrapa më të madh në 32 vite

Kryetari i Partisë Demokratike, Sali Berisha, doli në një deklaratë për gazetarët pasditen e së martës, ku raportoi mbi takimin e zhvilluar me dy përfaqësues të Asamblesë Parlamentare të Këshillit të Europës, të ngarkuar si raportues për Shqipërinë në fazën e post-monitorimit.

“Zhvilluam një takim të hapur, ku informova përfaqësuesit e Asamblesë Parlamentare të Këshillit të Europës se parlamenti shqiptar nuk njofton në mënyrë të rregullt anëtarët e delegacionit shqiptar për takimet e kërkuara nga vetë anëtarët e delegacionit,” tha Berisha.

Berisha shtoi se gjatë takimit i ka informuar raportuesit për kthimin pas në proceset demokratike të Shqipërisë, pas heqjes së monitorimit:

“Shqipëria ka pësuar një kthim mbrapa më të madh në 32 vite. U ndala gjerësisht në çështjen e sundimit të ligjit dhe lidhjeve të tmerrshme me krimin. Unë mendoj se patëm një nga nga diskutimet më të hapura me partnerët tanë. Natyrisht, qëndrimi ynë është rikthimi i monitorimit në mënyrë që shqiptarët të mos rrokullisen më në këto honet e narkoshtetit siç po ndodh tani. Të gjitha ato të cilat unë diskutova sot me miqtë tanë, duke patur bindje të thellë se jam në këtë mënyrë zëri i shqiptarëve që e duan këtë vend, që duan shtetin ligjor, që duan të drejtat e njeriut, që duan të ardhmen evropiane”, tha Berisha.