U kap duke shitur lëndë narkotike, pranga 23-vjeçarit në Shkodër! I gjenden në banesë dy armë dhe një thikë

Policia e Shkodrës, mbrëmjen e djeshme, ka vënë në pranga një 23-vjeçar, pasi u kap në flagrancë duke shitur lëndë narkotike te vendi i quajtur ura e Mesit.

Në kuadër të operacionit të koduar “Ura”, në pranga ka rënë shtetasi A. M., 23 vjeç, banues në fshatin Hot i Ri, të cilit në banesë e tij u gjetë 1 armë zjarri kallashnikov, një pushkë pneumatike dhe një thikë.

“Shërbimet e Forcës së Posaçme “Shqiponja”, në vijim të punës për goditjen e veprimtarive kriminale, bazuar dhe në informacionet e siguruara në rrugë operative për një shtetas që shiste lëndë narkotike, organizuan dhe finalizuan operacionin policor të koduar “Ura”, si rezultat i të cilit u arrestua shtetasi:

-A. M., 23 vjeç, banues në fshatin Hot i Ri.  

Ky shtetas u kap në flagrancë nga shërbimet e Policisë, gjatë natës, te ura e Mesit, me doza Kokaine dhe Kanabisi, gati për shitje.        

Në vijim, gjatë kontrollit në banesën e këtij shtetasi, u gjetën 1 armë zjarri kallashnikov, një pushkë pneumatike dhe një armë e ftohtë (thikë). 

Vijojnë hetimet për dokumentimin e veprimtarive kriminale të këtij shtetasi”, thuhet në njoftimin e policisë.

Materialet procedurale iu referuan Prokurorisë, për hetime të mëtejshme.