Turi i Kryeministrit me studentët “BE-ja dhe ti”, Ministri i Jashtëm: Kemi një projekt që duhet ta kthejmë në rezultat

Mëngjesin e kësaj të enjteje, Kryeministri Edi Rama ka lançuar nisjen e turit “BE-ja dhe ti” me studentët, ku sipas prezantimit do të ketë një ballafaqim me të rinjtë për projektin e integrimit.

Në nisje të prezantimit ka folur në hapjen e turit Ministri i Jashtëm, Ferid Hoxha, i cili ka thënë se ky është një projekt që, sipas tij, do të kthehet në rezultat.

“Nuk duam të flasim për ju, duam të flasim me ju, duam t’ju dëgjojmë, të shikojmë si e perceptoni procesin sepse jemi bashkë. Këto takime do të mundohemi t’i bëjmë në formë të tillë për të parë sa shihet, sa preket, sepse integrimi në BE është proces për ta ribërë vetveten. Na takon të gjithëve të jemi të përfshirë sepse na prek të gjithëve. Dikur ishte ëndërr. Sot e kemi bërë projekt dhe duam ta kthejmë në rezultat. Nuk ka ndalesë, nuk ka pushim, nuk ka pauzë dhe duhet ta çojmë në destinacion. Ju jeni brezi që do ta shijojë BE-në. Do të jeni përfituesit dhe duhet të jeni edhe kontribuesit. Hyrja në BE është një mendësi dhe mendësia duhet ndryshuar sepse është një sistem vlerash që fillon te secili prej nesh”, tha Hoxha.