Dogji një automjet në fshatin Pluk, arrestohet 38-vjeçari në Lushnje! Në kërkim porositësi

Një 39-vjeçar është vënë në pranga nga policia në Lushnje. Arrestimi i tij erdhi pasi ai dogji një mjet në fshatin Pluk me porosi të një 28-vjeçari. I arrestuari rezulton me precedentë të mëparshëm penal.

Pas ngjarjes policia identifikoi dhe arrestoi autorin ndërsa po punohet për kapjen e porositësit. 28-vjeçari mësohet se kishte konflikt për motive pronësie me xhaxhain e personit që iu dogj mjeti.

“Dogji automjetin e një shtetasi, me porosi të një 28-vjeçari, identifikohet dhe kapet 39-vjeçari (shtetas me precedent penal). Punohet për kapjen e 28-vjeçarit, i cili dyshohet se e porositi krimin, për shkak të konflikteve për motive pronësie, me xhaxhanë e pronarit të automjetit të djegur.

Menjëherë pas kallëzimit të shtetasit D. V., se i kishin djegur automjetin, në afërsi të banesës së tij, në fshatin Pluk, shërbimet e Komisariatit të Policisë Lushnjë organizuan punën operacionale dhe veprimet hetimore për të përcaktuar autorësinë e rastit dhe për të sqaruar rrethanat.

Si rezultat, u identifikua, u kap dhe u vu në pranga autori i dyshuar i djegies, shtetasi M. B., 39 vjeç, banues në këtë fshat.

Gjithashtu, u identifikua shtetasi që dyshohet se porositi kryerjen e këtij krimi, A. Z., 28 vjeç, i cili nga veprimet hetimore, rezultoi se ka qenë në konflikt me xhaxhanë e shtetasit D. V., për motive pronësie. Punohet intensivisht për kapjen e 28-vjeçarit. Materialet procedurale iu referuan Prokurorisë së Fierit, për veprime të mëtejshme”, njofton policia.