U kap duke transportuar 13 emigrantë egjiptian kundrejt pagesës, arrestohet 27-vjeçari në Sarandë

Një 27-vjeçar ka rënë në pranga nga policia e Sarandës, pasi u kap në flagrancë gjatë natës duke transportuar me automjet, kundrejt pagesës, 13 emigrantë nga Egjipti.

Sipas raportimeve të policisë, në pranga ka rënë shtetasi E. Y., 27 vjeç, banues në Patos, i cili u kap në fshatin Xarrë duke transportuar 13 emigrantë, të cilët dyshohet se kishin hyrë ilegalisht në Shqipëri dhe synonin të kalonin në vendet e BE-së.

“Shërbimet e Policisë Kufitare Sarandë, në vijim të kontrolleve intensive dhe punës hetimore për parandalimin dhe goditjen e paligjshmërive, bazuar dhe në informacionet e siguruara në rrugë operative, kanë organizuar dhe finalizuar operacionin e koduar “Distanca”, për goditjen e një rasti të dhënies ndihmë emigrantëve, për kalim të paligjshëm të kufijve. Si rezultat i operacionit, u arrestua shtetasi:

-E. Y., 27 vjeç, banues në Patos.

Ky shtetas u kap në flagrancë, gjatë natës, në fshatin Xarrë, duke transportuar me automjet, 13 emigrantë nga Egjipti, kundrejt pagesës. Nga hetimet dyshohet se këta shtetas kanë hyrë ilegalisht në Shqipëri, nga kufiri me Greqinë, dhe synonin të kalonin ilegalisht në vendet e tjera të BE-së. 

Automjeti më të cilin transportoheshin emigrantët u sekuestrua në cilësinë e provës materiale.

Vijojnë hetimet për dokumentimin e kësaj veprimtarie kriminale dhe identifikimin e shtetasve të tjerë që mund të jenë të përfshirë”, thuhet në njoftimin e policisë.

Materialet procedurale iu referuan Prokurorisë së Sarandës, për veprën penale “Ndihma për kalim të paligjshëm të kufijve”.