Bardhi: Opozita po pengohet për ngritjen e komisioneve hetimore dhe kontrollin parlamentar

Pas rrëzimit të kërkesës për ngritjen e dy komisioneve hetimore nga Konferenca e Kryetarëve, kreu i Grupit Parlamentar të PD-së, Gazment Bardhi, dha një prononcim për mediat, ku deklaroi mazhoranca po pengon punën e opozitës për të kryer kontrollin parlamentar.

Bardhi tha se Partia Socialiste po e kthen institucionin e Kuvendit pasiv, duke mos lejuar deputetët, dhe më konkretisht opozitën, të ushtrojë funksionet parlamentare. Ai u shpreh se e ka dëgjuar shpesh kryeministrin të thotë se opozita po pengon procesin e integrimit por sipas tij në fakt është mazhoranca ajo që e bën këtë gjë.

“Me një vendim antikushtetues, mazhoranca rrëzoi dy kërkesa për ngritjen e komisioneve hetimore që lidhen me raportin e DASH për klimën e investimeve në Shqipëri. Bëhet kërkesa e pestë për komision hetimor që mazhoranca me votë politike pengon opozitën të kryejë kontroll parlamentar. Mocioni i shtatë me debat u refuzua gjithashtu. Me direktivë të kryeministrit Edi Rama, maxhoranca rrëzoi kërkesat e opozitës për krijimin e dy Komisioneve Hetimore parlamentare”, tha ai.