“Synohet turizmi gjithëvjetor” – Mblidhet Komiteti për Menaxhimin e Sezonit Turistik në Vlorë

Është mbledhur në ambientet e Prefekturës së Qarkut Vlorë, Komiteti për Menaxhimin e Sezonit Turistik. Nën drejtimin e prefektes së qarkut Vlorë, Evis Allushi, dhe me prezencën e zv.ministres së Turizmit, Marinela Prifti, është diskutuar mbi menaxhimin e sezonit turistik dhe marrjen e masave për mbarëvajtjen e tij.

Në fjalën e saj, zëvendësministrja e Turizmit, Prifti, u shpreh se objektivi është që sezoni turistik të zgjatet në kohë, duke shkuar drejt turizmit gjithëvjetor. Sipas saj, në 3 muajt e parë të këtij viti, krahasuar me një vit më parë, ka mbi 11% rritje të numrit të turistëve. Kjo rritje, sipas Priftit, i vendos institucionet në përgjegjësi për të menaxhuar siç duhet sezonin veror.

Prefektja e qarkut Vlorë, Evis Allushi, thotë se qëllimi i mbledhjes së komitetit është rritja e bashkëpunimit mes institucioneve për menaxhimin e sezonit veror. Ajo thekson se çdo institucion duhet të përmbushë detyrat që ka, pasi do të jetë në monitorim të vazhdueshëm. E prerë në fjalën e saj, Allushi iu drejtua institucioneve duke u kërkuar të jenë në terren, pranë çdo pushuesi, pasi në të kundërt, për mospërmbushje të detyrave, do të raportohen në qeveri dhe ministrinë e linjës.

Elidon Çela, drejtues i Policisë së Qarkut Vlorë, pohon se nga pikëpamja e sigurisë, sezoni i vitit të kaluar ishte një histori suksesi. Siguria rrugore dhe menaxhimi i zhurmave kanë qenë prioritet dhe do të vazhdojnë të jenë edhe këtë vit. Sipas Çelës, problem mbetet zaptimi i hapësirave publike në plazhe dhe mosndarja e tyre në kohë nga Agjencia Kombëtare e Bregdetit.

Mbledhja e Komitetit të Menaxhimit të Sezonit Turistik Vlorë–Himarë vjen në prag të nisjes së sezonit veror, ku Vlora pritet të jetë një ndër qytetet më të preferuara për turistët.