I vodhi çantat e dorës me para dy shtetasve, arrestohet i mituri në Shkodër

Një i mitur 14-vjeçar ka rënë në prangat e Policisë së Shkodrës, pasi dyshohet se i ka vjedhur dy shtetasve çantat e dorës, ku ata mbanin shuma parash.

Në njoftimin e saj, policia bën të ditur se është sekuestruar një pjesë e parave të vjedhura dhe një monopatinë me të cilën lëvizte autori, të cilën dyshohet se e kishte blerë me paratë e vjedhura.

“Në cilësinë e provës materiale u sekuestruan 600 euro dhe një monopatinë me të cilën lëvizte 14-vjeçari, të cilën dyshohet se e kishte blerë me paratë e vjedhura”, thuhet në njoftim.

14-vjeçari dyshohet se më datë 08.04.2026, në oborrin e Spitalit Rajonal Shkodër, i ka vjedhur shtetasit E. Dh., 45 vjeç, banues në Tiranë, çantën e dorës, ku ai mbante një shumë parash.

Gjithashtu, nga hetimet dyshohet se më datë 13.03.2026, në bulevardin “Bujar Bishanaku”, i ka vjedhur shtetases M. T., 45 vjeçe, banuese në Shkodër, çantën e dorës, ku ajo mbante një shumë parash.

Materialet procedurale i janë referuar Prokurorisë për veprime të mëtejshme.