Qeveria miraton rregullat për organizmin e lojërave të fatit

Këshilli i Ministrave ka miratuar këtë të premte rregullat për organizimin dhe funksionimin e Këshillit të Mbështetjes së Projekteve, një strukturë e re e ngritur pranë Autoritetit të Mbikëqyrjes së Lojërave të Fatit.

Vendimi përcakton në mënyrë të detajuar mënyrën e ngritjes, organizimit dhe funksionimit të këtij këshilli, i cili do të ketë rol kyç në mbështetjen dhe financimin e projekteve në këtë fushë.

Sipas vendimit, janë përcaktuar gjithashtu kushtet dhe kërkesat që duhet të plotësojnë subjektet për të përfituar financim, si dhe dokumentacioni i nevojshëm për aplikim. Një tjetër element i rëndësishëm është edhe procedura që do të ndiqet për shqyrtimin dhe vlerësimin e projekteve, me qëllim garantimin e transparencës dhe objektivitetit.

Krijimi i këtij këshilli synon të forcojë mekanizmat e mbështetjes për iniciativa të ndryshme, duke siguruar një proces të strukturuar dhe të qartë për përzgjedhjen e projekteve që do të financohen.

Ky vendim hyn në fuqi menjëherë dhe pritet të ndikojë në rritjen e standardeve të menaxhimit dhe mbikëqyrjes në sektorin e lojërave të fatit në vend.