Gonzato takim me Avokatin e Popullit: Mbrojtja e të drejtave të njeriut në thelb të angazhimit të BE

Ambasadori i Bashkimit Evropian në Shqipëri, Silvio Gonzato ka zhvilluar këtë të premte një takim me Avokatin e Popullit, Endrit Shabani. Ambasadori përmes një postimi në “X” ka ndarë pamje dhe detaje nga bisedimet në këtë takim.

Gonzato shkruan se gjatë takimit theksoi rëndësinë e pavarësisë, besueshmërisë dhe besimit publik të institucionit në kontekstin e anëtarësimit të Shqipërisë në BE. Ai shton se ritheksoi se mbështetjen e BE-së për institucionin në kryerjen efektive të mandatit të tij në mbrojtjen e të drejtave të njeriut.

“Mbrojtja e të drejtave të njeriut mbetet në thelb të angazhimit tonë në Shqipëri. Sot, në takimin me Avokatin e Popullit, Endrit Shabani, diskutuam rolin e institucioneve të pavarura në mbrojtjen e tyre. Theksova rëndësinë e pavarësisë, besueshmërisë dhe besimit publik të institucionit në kontekstin e anëtarësimit të Shqipërisë në BE.

Diskutuam gjithashtu nevojën për të përmirësuar shkallën e zbatimit të rekomandimeve të Avokatit të Popullit, duke siguruar që shqetësimet e qytetarëve të çojnë në veprime konkrete. Ripohova mbështetjen e BE-së për institucionin në kryerjen efektive të mandatit të tij në mbrojtjen e të drejtave të njeriut”, shkruan ai në “X”.