SPAK kërkon pushimin e çështjes për ish-kreun e Prokurimeve Publike, Jonaid Myzyri

SPAK  ka mbyllur hetimet për ish kreun e komisionit të prokurimit publik, Jonaid Myzyri dhe ka depozituar kërkesë në GJKKO për pushimin e çështjes në ngarkim të tij.

Myzyri u hetua dhe madje u mor i pandehur nga prokuroria e posaçme për veprën “Shkelja e barazisë së pjesëmarrësve në tenderë apo ankande publike”, kryer në bashkëpunim.

Përveç tij edhe për anëtaret e KPP Vilma Zhupaj, Lindita Skeja, Merita Zeqaj dhe Enkeleda Bega SPAK kërkon po ashtu mbylljen e dosjes.

Prokuroria e posaçme e mori të pandehur Myzyrin në qershor të vitit 2025, në lidhje me një procedurë tenderuese me vlerë rreth 2.2 milionë euro të kryer në vitin 2020 për mirëmbajtjen e segmentit rrugor Rrëshen (Ura e Fanit)-Shpal, Shpal-Qafë Bene-Hadroj dhe Shpal-Ura e Repsit me gjatësi totale 59 kilometra.

Ndaj Myzyrit në fillim të hetimeve u vendos edhe masa “Pezullim i ushtrimit të një detyre a shërbimi publik”.