Anëtarja e Kryesisë së PD, Pampuri: Paniku vjen nga pasiguria që ofron shteti

Anëtarja e Kryesisë së Partisë Demokratike, Orjola Pampuri thotë se, masat e ndërmarra nga qeveria deri tani për coronavirusin nuk plotësojnë protokollet e Organizatës Botërore të Shëndetësisë.

Znj. Pampuri kërkoi që të bëhet më shumë transparencë për masat dhe fondet pasi sipas saj vihet re mungesë e pajisjeve në spitale dhe qendra shëndetësore.

“Masat nuk janë ato që duhet të ishin. Nuk janë masat që plotësojnë protokollet e OBHS-së”, u shpreh ish-deputetja duke folur për Euronews Albania. “Do të doja që të gjithë këto që ne i vëmë në pah të ishin në ndihmë të qytetarëve që të mos i kapi paniku.”

Edhe pse, kanë kaluar dy muaj nga nisja e përhapjes së virusit në Kinë, ende sipas anëtares së Kryesisë së PD-së vihet re mungesa e masave mbrojtëse për vetë mjekët.

Për këtë arsye, znj. Pampuri deklaron se është e rëndësishme që të merren masa të menjëhershme për garantuar mbrojtjen e stafeve mjekësore.

Për qytetarët, tha ajo, mënyra më e mirë për të menaxhuar këtë situatë është qetësia dhe marrja e informacionit dhe ndjekja e këshillave.

“Nuk ka vend për panik, duhet të ndjekim hapat e parashikuara nga OBSH. Qeveria duhet të informojë qytetarët që të mos preken nga paniku. Fondi prej 3.5 milionë euro i alokuar sot nga qeveria nuk mjaftojnë. I gjithë ky panik ndodh nga pasiguria që ndjejnë tek shteti”, përfundoi znj. Pampuri.