Aksident me vdekje në Lushnje, përmbyset zetori! Humbet jetën 71-vjeçari

Një aksident i rëndë është regjistruar mëngjesin e kësaj të hëne në fshatin Dushk të Lushnjës, ku si pasojë ka humbur jetën një 71-vjeçar, i identifikuar si Hekuran Xhelo.

Sipas raportimeve paraprake, aksidenti ka ndodhur në vendin e quajtur Rruga e Rezervuarit. Mësohet gjithashtu se 71-vjeçari, me mjetin e tij bujqësor, zetor, dyshohet se ka humbur kontrollin, duke dalë jashtë rruge dhe duke u përmbysur, ku për pasojë ka gjetur vdekjen në vendin e ngjarjes.

“Një 71 vjeçar ka humbur jetën mëngjesin e sotëm në fshatin Dushk bashkia Lushnje. Hekuran Xhelo, ishte duke lëvizur me mjetin bujqësor tip zetor me rimorkio për të shkuar të punonte në tokat e tij. Në një pjesë të rrugën në dishezë, Xhelo ka humbur kontrollin mbi mjetin bujqësor dhe ka përfunduar në kanalin përbri rrugës. Hekurani ka qenë i vetëm në mjetin bujqësor dhe përmbysja i ka shkaktuar vdekjen e menjëhershme.

Grupi hetimor në vendngjarje po kryen dokumentimin e ngjarjes së rëndë dhe do të përcaktojë shkaqet që sollën aksidentin fatal. Trupi i të ndjerit është përcjellë në morgun e spitalit të Lushnjes ku do të kryehet ekzaminimi mjeko ligjor. Rruga në të cilën ka humbur kontrollin mbi mjetin bujqësor është rrugë bujqësore e shtruar me çakull, çka dyshohet se mund të ketë sjellë daljen nga rruga për shkak të shpejtësisë”, thuhet në njoftimin e policisë.