Ministrja franceze e Shëndetësisë: Ende nuk dihet nëse hantavirusi ka pësuar mutacion

Ministrja franceze e Shëndetësisë, Stephanie Rist, deklaroi se autoritetet ende nuk mund të konfirmojnë me siguri nëse lloji i hantavirusit i lidhur me shpërthimin në anijen turistike MV Hondius ka pësuar mutacion, megjithëse deri tani situata vlerësohet si relativisht qetësuese.

Duke folur në Asamblenë Kombëtare Franceze, Rist tha se ende ka shumë elementë të panjohur lidhur me virusin dhe se analiza e plotë laboratorike nuk ka përfunduar.

“Ka ende gjëra që nuk i dimë për këtë virus. Nuk kemi ende sekuencën e plotë, e cila do të na lejonte të thoshim me siguri, edhe pse deri tani jemi mjaft qetësues, se virusi nuk ka pësuar mutacion”, deklaroi ministrja franceze.

Ndërkohë, Organizata Botërore e Shëndetësisë ka bërë të ditur se deri tani nuk ka asnjë tregues që të sugjerojë se po ndodh diçka e pazakontë me variantin e hantavirusit të identifikuar në anije, përtej faktit të vendndodhjes së shpërthimit.

Sipas autoriteteve shëndetësore, shpërthimi është lidhur me hantavirusin e Andeve, një variant i njohur në Amerikën e Jugut. Zyrtarët francezë dhe ndërkombëtarë po bashkëpunojnë me ekspertë nga Argjentina, ku në vitin 2019 u regjistrua një shpërthim i ngjashëm me të njëjtin lloj virusi.

OBSH ka konfirmuar deri tani nëntë raste të lidhura me situatën në MV Hondius dhe ka rekomanduar izolimin e rasteve të dyshuara, duke paralajmëruar se mund të identifikohen raste të tjera për shkak të kontakteve dhe ndërveprimeve mes pasagjerëve para zbulimit të virusit.

Megjithatë, organizata thekson se aktualisht nuk ka prova që tregojnë për një përhapje më të gjerë apo për një rrezik pandemik.

"EN DIRECT – Hantavirus : il n’y a «pas d’éléments en faveur d’une circulation diffuse du virus» en France, assure la ministre de la Santé"https://t.co/rJpYluRl3i

— MS🇨🇵 (@ilanyo1301) May 12, 2026