Avenir Peka për sulmet online: Nga Hero kur mbroja Kurtin më telendisën në komente me adresa fallco

Analisti Avenir Peka, i ftuar në “Review” me Greta Topjana, ka diskutuar mbi situatën në Kosovë përpara zgjedhjeve, kryesisht incidentin e ndodhur në Skenderaj ku pretendohet se është sulmuar fizikisht kryetari i LVV-së Hysni Mehani.

Peka shpjegon fenomenin e “luftës hibride”, linçimeve publike dhe sulmeve në rrjetet sociale përmes profileve false ndaj kujtdo që kritikon pushtetin në Kosovë.

“Unë kam vënë re edhe ne që jemi në këtë studio, herë të tjera që kemi qenë në këtë studio… Sa herë kam lëvduar Albinin dhe jam nga ata që të paktën tre vitet e fundit kanë qenë mbështetës i fortë për qëndrimet e tij, kam qenë ‘hero’ në rrjetet e këtyre anonimëve.

Dy herë të fundit, pas zgjedhjeve që kanë filluar e kanë kritikuar, më kanë telendis në komente”, tha Peka.

Nga ana tjetër, gazetarja dhe moderatorja Esmeralda Mulaj thekson se linçimet dhe sharjet me profile fake janë kthyer në një problem të madh në Kosovë.

“Ndaj zonjës Osmani po përdoret edhe inteligjenca artificiale me video të montuara dhe fyerje skandaloze. Kushdo që guxon të ketë një qëndrim kundër Kurtit apo eksponentëve të tjerë politikë, përballet me një ushtri virtuale kërcënimesh e ofendimesh në Facebook”, tha Mulaj.