Treguesi i besimit në ekonomi u rrit lehtë në maj, i mbështetur nga ndërtimi dhe shërbimet

Treguesi i ndjesisë ekonomike u rrit lehtë me 1.1 pikë në muajin maj. Sipas sondazhit të Bankës së Shqipërisë, ky tregues ndodhet pranë nivelit mesatar të dy viteve të fundit dhe rreth 7 pikë mbi mesataren historike.

Rritja e muajit maj u diktua kryesisht nga përmirësimi i besimit në sektorët e ndërtimit dhe të shërbimeve, si dhe rritja e besimit konsumator. Nga ana tjetër, rënia e besimit në tregti kontribuoi negativisht, ndërsa besimi në sektorin e industrisë nuk pati ndryshime domethënëse.

Treguesi i besimit në ndërtim u rrit me 0.7 pikë përqindje në maj. Aktualisht, niveli i tij qëndron rreth 13.3 pikë përqindje mbi mesataren historike. Në rritje ndikoi kryesisht vlerësimi i përmirësuar i aktivitetit aktual ndërtues, ndërsa vlerësimet për kontratat porositëse dhanë një kontribut të vogël rënës. Pritjet për çmimet në të ardhmen regjistruan rënie këtë muaj.

Treguesi i besimit në shërbime u rrit me 3.4 pikë përqindje në muajin maj. Aktualisht, niveli i tij qëndron rreth 12.6 pikë përqindje mbi mesataren historike. Ecuria u ndikua pozitivisht nga vlerësimi i bizneseve për nivelin e kërkesës dhe ecurinë aktuale të biznesit të tyre. Pritjet e bizneseve për çmimet në të ardhmen mbetën të pandryshuara.

Treguesi i besimit të industrisë ruajti të njëjtin nivel me një muaj më parë, duke qëndruar rreth 8.3 pikë përqindje mbi mesataren historike. Nga pikëpamja e komponentëve të TBI-së, bizneset e industrisë raportuan rritje të prodhimit këtë muaj, pavarësisht se kontratat porositëse i vlerësojnë në rënie. Pritjet e bizneseve për çmimet në të ardhmen regjistruan rënie.

Treguesi i besimit në tregti u ul me 3.3 pikë përqindje në maj. Niveli i tij qëndron rreth 9.7 pikë përqindje mbi mesataren historike. Rënia u ndikua si nga vlerësimet më pak optimiste të bizneseve për ecurinë aktuale të shitjeve, ashtu edhe nga pritjet në rënie për punësimin. Pritjet për çmimet në të ardhmen regjistruan ulje të dukshme, pas prirjes rritëse të dy muajve të kaluar.