Bedri Hamza voton me familjen: Dilni në votime, sot vendosim për katër vitet e ardhshme

Kandidati për kryeministër nga Partia Demokratike e Kosovës, Bedri Hamza, ka ushtruar të drejtën e votës këtë të diel, së bashku me familjen e tij, në kuadër të zgjedhjeve të jashtëzakonshme.

Pas votimit, Hamza u bëri thirrje qytetarëve që të dalin në votime dhe të shprehin vullnetin e tyre në mënyrë të lirë dhe demokratike.

“Bashkë me familjen time sapo e shfrytëzuam të drejtën tonë për të votuar. I ftoj të gjithë qytetarët që ta shfrytëzojnë këtë të drejtë, të dalin të votojnë sipas bindjeve të tyre politike, në mënyrë të lirë, të qetë dhe demokratike. Është një ditë e bukur dhe ne sot vendosim për të ardhmen e katër viteve të ardhshme”, deklaroi Hamza.

Ai votoi në shkollën “Andon Zako Çajupi” në Mitrovicë.

Sipas të dhënave të publikuara nga Komisioni Qendror i Zgjedhjeve, deri në orën 10:19, pjesëmarrja në votime në Mitrovicën e Jugut kishte arritur në 3.49%, ose 2,805 qytetarë nga 80,271 votues me të drejtë vote.