Zgjedhjet në Kosovë, Vetëvendosje shpall fitoren

Lidhja Demokratike e Kosovës (LDK) ka vlerësuar se ka shënuar rritje të konsiderueshme në zgjedhjet e parakohshme parlamentare, duke e cilësuar rezultatin preliminar si fillim të ringritjes së partisë.

Në konferencën për media pas publikimit të rezultateve preliminare, kandidati për kryeministër nga LDK-ja, Lumir Abdixhiku,  bëri të ditur se partia e tij nuk do të heqë dorë nga kandidatura e Vjosa Osmanit për presidente në kuadër të diskutimeve për formimin e institucioneve të reja.

“Nuk do të kishte kuptim që të dilnim në fushatë me kandidaturën për presidente e më pas në konferencë për media pas përfundimit të zgjedhjeve t’i refuzonim në momentin e parë. Nuk është politikë e imja e as e LDK-së. Nuk kemi ndërmend të bëjmë kompromise me gjërat që kemi kërkuar mbështetje qytetare. Jemi të interesuar për stabilitet institucional. Ne kemi qenë të gatshëm për bisedime me të gjitha partitë shqiptare, përveç Listës Serbe. Dhe jemi të vetëdijshëm se çështja e presidentit do të jetë çështja e parë që do të diskutohet. Ne kemi kandidaten tonë dhe ajo do të jetë pikënisja e çdo bisedimi”, ka deklaruar Abdixhiku.

Ai tha se qytetarët e Kosovës folën qartë përmes votës së tyre në një proces që, sipas tij, ishte i lirë, i qetë dhe demokratik.   “Kosova foli sot qartë. Qytetarët tanë folën me votë, folën lirshëm, folën qetë dhe demokratikisht. Në një rajon që njeh shumë tensione zgjedhore, Republika e Kosovës dëshmoi edhe njëherë pjekuri demokratike. Për këtë meritoni falënderim ju, të dashur qytetarë, që me pjesëmarrjen tuaj dhe me sjelljen tuaj e bëtë këtë ditë një festë të demokracisë së Kosovës. Demokracia e Kosovës forcohet pikërisht në ditë si kjo zgjedhore, kur vullneti i qytetarëve respektohet dhe institucionet funksionojnë. Në veçanti dua t’i falënderoj mbështetësit dhe votuesit e Lidhjes Demokratike të Kosovës, secilin qytetar që besoi te ne, që na dha mbështetje gjatë këtyre javëve, na hapi derën, na dha dorën, na dha zemrën dhe mbi të gjitha na dha besimin”, tha Abdixhiku.

Ai falënderoi qytetarët për pjesëmarrjen në zgjedhje dhe mbështetësit e LDK-së për besimin e dhënë gjatë fushatës, duke theksuar se rezultati është produkt i angazhimit të strukturave të partisë, aktivistëve, kandidatëve, komisionarëve dhe vëzhguesve. “Ky rezultat i sotëm është reflektim i një bashkimi të madh njerëzor e politik. Është rezultat i një fryme të re që e kemi ndërtuar së bashku me Vjosa Osmanin. Është rezultat i punës së jashtëzakonshme dhe të palodhshme të strukturave tona, të kryetarëve të degëve, aktivistëve, grave, të rinjve, kandidatëve tanë, të 110 kandidatëve, komisionerëve, vëzhguesve që ruajtën votën dhe mbi të gjitha të qytetarëve që donin ndryshim në Kosovë”, u shpreh ai.

Kandidatja për presidente nga radhët e LDK-së, Vjosa Osmani, ka folur pas rezultateve preliminare të zgjedhjeve parlamentare, ku kjo parti ka marrë 17,69 për qind.

“Dua edhe njëherë t’i falënderoj të gjithë qytetarët e Republikës së Kosovës për përkrahjen që na kanë dhënë në këto zgjedhje, të cilat, përkundër kohës tepër të shkurtër që kishim në dispozicion për fushatë dhe për të prezantuar vizionin tonë, e rritën LDK-në apo votën elektorale për rreth 34 për qind, apo tani jemi në 20 mandate, e që është rritja më e madhe që ka pasur cilido subjekt politik që ka garuar në këto zgjedhje”, tha Osmani në konferencë për media.

“Natyrisht që ky është veç hapi i parë drejt ringritjes, por kjo rritje na jep shpresë se jemi në rrugë të drejtë dhe, edhe me shumë më shumë punë në terren, afër qytetarëve tanë, besoj që LDK-ja do të vazhdojë të ringritet edhe më tej”.

Janë numëruar rreth 90 për qind të votave nga vendvotimet në Kosovë.

Lëvizja Vetëvendosje nga numërimi i 90.47 për qind të vendvotimeve, ka marrë 43.71 për qind të votave si partia më e madhe. Ajo ka marrë më shumë se 273 mijë vota.

Partia Demokratike e Kosovës ka marrë 21.58 për qind të votave, apo 135 mijë vota.

Lidhja Demokratike ka 17.99 për qind të votave apo rreth 113 mijë vota.

Aleanca për Ardhmërinë e Kosovës ka marrë 7.28 për qind të votave apo rreth 46 mijë vota.

Në total, më 7 qershor në zgjedhjet e parakohshme parlamentare pati rënie të daljes së votuesve. Aktualisht, LVV-ja nga katërshja e madhe është e vetmja me rezultat më të dobët se në zgjedhjet e 28 dhjetorit.

KQZ-ja ka përditësuar rezultatet e zgjedhjeve të mbajtura këtë të diel.

Nga 2122 kuti të numëruara nga 2498 që janë gjithsej apo 84.55% e tyre rezultatet janë si në foton më lart.

Ndërsa më poshtë keni rezultatet e zgjedhjeve të fundit, të mbajtura në 28 dhjetor 2025 për të bërë krahasimin se kush humbi dhe kush fitoi.

Organizata Demokracia në Veprim publikoi rezultatet preliminare të zgjedhjeve të 7 qershorit, bazuar në të dhënat e mbledhura nga vëzhguesit e saj.

Sipas këtyre rezultateve, Lëvizja Vetëvendosje prin me 42.7 për qind të votave, me një marzh gabimi prej 1.7 për qind.

Partia Demokratike e Kosovës renditet e dyta me 21.5 për qind, me marzh gabimi 1.6 për qind, ndërsa Lidhja Demokratike e Kosovës është e treta me 17.7 për qind dhe marzh gabimi 1.1 për qind.

Aleanca për Ardhmërinë e Kosovës mori 7.1 për qind të votave, po ashtu me marzh gabimi 1.1 për qind.

Këto rezultate nuk përfshijnë votat me kusht dhe ato të diasporës.

Ushtruesja e Detyrës së Presidentes së Republikës së Kosovës, Albulena Haxhiu pas procesit të votimit në zgjedhjet e parakohshme parlamentar në vend, ka ftuar të gjithë personat përgjegjës që të angazhohen maksimalisht në mbrojtjen e vullnetit të popullit dhe integritetit të procesit.

“Pas mbylljes së qendrave të votimit, fillon faza vendimtare e procesit zgjedhor, numërimi. Çdo votë është zëri i qytetarëve dhe duhet të trajtohet me përgjegjësinë më të lartë.

Ftoj të gjithë personat përgjegjës që me përkushtim, vigjilencë dhe profesionalizëm të angazhohen maksimalisht në mbrojtjen e vullnetit të popullit dhe integritetit të procesit.

Ju uroj shumë suksese, punë të mbarë dhe që rezultati përfundimtar të pasqyrojë besnikërisht vullnetin e qytetarëve”, shkruan ajo në rrjete sociale.

Numërimi i votave ka sjellë një përditësim të ri të rezultatit zgjedhor, ku Lëvizja Vetëvendosje vijon të mbajë vendin e parë me 43.09% të votave, ose 207,253 vota.

Forca e dytë politike mbetet Partia Demokratike e Kosovës (PDK), e cila ka siguruar 21.82% të votave, e ndjekur nga Lidhja Demokratike e Kosovës (LDK) me 17.98%.

Ndërkohë, Aleanca për Ardhmërinë e Kosovës (AAK) renditet e katërta me 7.63% të votave të numëruara deri më tani.

Rezultatet e përditësuara tregojnë se gara për vendin e dytë dhe të tretë mbetet e hapur, ndërsa Vetëvendosje ruan një epërsi të konsiderueshme ndaj kundërshtarëve politikë.

Rezultatet e përditësuara:

• Vetëvendosje – 43.09% (207,253 vota)
• PDK – 21.82% (104,943 vota)
• LDK – 17.98% (86,456 vota)
• AAK – 7.63% (36,683 vota)

Procesi i numërimit dhe verifikimit të votave vijon, ndërsa pritet publikimi i rezultateve.

Komisioni Qendror i Zgjedhjeve në Kosovë ka njoftuar se deri më tani janë numëruar 40.23% të votave, në zgjedhjet e jashtëzakonshme parlamentare të zhvilluara ditën e sotme.

Nga rezultatet deri më tani, Lëvizja Vetëvendosje ka marrë 41,24% të votave. Partia Demokratike e Kosovës ka marrë 21,93% të votave. Lidhja Demokratike e Kosovës ka marrë 18,08% të votave. Aleanca për Ardhmërinë e Kosovës ka marrë 8,31% të votave

Kandidati për kryeministër nga Partia Demokratike e Kosovës, Bedri Hamza, ka vlerësuar se qytetarët e Kosovës kanë treguar qytetari, përgjegjësi dhe kulturë demokratike gjatë procesit zgjedhor.

Ai ka thënë se në një proces të qetë dhe dinjitoz, qytetarët kanë dëshmuar besimin e tyre në fuqinë e votës dhe në të drejtën për të vendosur për të ardhmen e vendit.

Hamza ka falënderuar pjesëmarrësit në zgjedhje, si dhe institucionet, komisionerët, vëzhguesit, mediat dhe forcat e rendit për angazhimin e tyre në mbarëvajtjen e procesit.

Ai ka theksuar se është me rëndësi që çdo votë të numërohet me kujdes dhe të respektohet plotësisht vullneti i qytetarëve, duke shtuar se demokracia nuk përfundon me votim, por me respektimin e tij.

Kryeministri i Kosovës, Albin Kurti përmes një postimi në Facebook ka reaguar pas mbylljes së procesit të votimit për zgjedhjet e parakohshme parlamentare.

Kurti theksoi se vullneti i qytetarëve është shprehur dhe se tani përgjegjësia peshon te komisionerët dhe vëzhguesit.

Sipas tij mbrojtja e votës është kusht i pandashëm i legjitimitetit.

“Vullneti i qytetarëve i shprehur në zgjedhjet e sotme është brenda kutive të votimit. Mbrojtja e tij është kusht i pandashëm i legjitimitetit dhe kredibilitetit të procesit zgjedhor.

Në këto momente, sytë, veshët dhe vëmendja jonë janë te ju komisionerë dhe vëzhgues. Mbi juve peshon një përgjegjësi e lartë institucionale dhe fisnike. Ju falemnderit për angazhimin dhe punë të mbarë në numërimin e çdo vote’, shkruan Kurti.

Exit poll-et e disa televizioneve në Kosovë e nxjerrin LVV-në të parën me rreth 42% të votave, nën rezultatin prej mbi 51% në zgjedhjet e 28 dhjetorit. Sipas KQZ, janë numëruar 26.66% të votave, LVV ka 40.58% të votave, PDK 22.19% të votave.

Më pas LDK 18.53% të votave, AAK 9.24% të votave.

Rreth 2 milionë qytetarë të Kosovës kishin të drejtë vote në zgjedhjet e parakohshme parlamentare të 7 qershorit, të cilat u organizuan pas dështimit të Kuvendit për zgjedhjen e presidentit.

Zgjedhjet u zhvilluan pa incidente që do të ndikonin në mbarëvajtjen e procesit.

Kryetari i Komisionit Qendror të Zgjedhjeve, Kreshnik Radoniqi, ka njoftuar se rezultatet preliminare të zgjedhjeve parlamentare të 7 qershorit, do të dalin po sonte rreth orës 22:00.

Në konferencën e mbajtur për media pas përmbylljes së vendvotimeve, Radoniqi ka thënë se dalja e qytetarëve me të drejtë vote është rreth tetë për qind më e ulët krahasuar me zgjedhjet paraprake të mbajtura më 28 dhjetor 2025.

“Nga të dhënat preliminare të mbi 98% të vendvotimeve, numri i qytetarëve me të drejtë vote që kanë votuar deri në orën 19:00 është 712 mijë e 128 votues, apo 36.38% nga 1 milionë e 959 mijë e 962 votues. Deri në të njëjtën kohë për zgjedhjet e 28 dhjetorit kishin votuar 44.99 për qind. Në shumë vendvotime ka filluar numërimi i fletëvotimeve… Rezultatet preliminare do të dalin sonte, unë besoj që diku rreth orës 21:30 apo 22:00 maksimum, do të dalim me rezultate, megjithatë nuk do ta caktojë tani orën”, tha ai.

Gazetari i Euronews Albania, Xhemajl Rexha në një lidhje live nga një qendër votimi ka njoftuar se është mbyllur procesi i votimit. Ai ndër të tjera ka dhënë detaje lidhur me exit pollet e para që janë publikuar. Gazetari theksoi se sipas exit poll-it të Klan Kosovës, Vetëvendosja ka fituar 42.3% të votave, Partia Demokratike e Kosovës 21.6% të votave, Lidhja Demokratike e Kosovës (LDK) 17.3% të votave dhe Aleanca për Ardhmërinë e Kosovës (AAK) 6.8% të votave.

“Në fakt këtu në qendrën e votimit në qendër të Prishtinës, në shkollën “Faik Konica”, në orën 19:00 ka rënë zilja, siç bie për të nisur mësimi. Ka rënë zilja për të dhënë sinjalin se ka përfunduar votimi. Siç e shihni, korridoret e kësaj qendre votimi janë boshatisur.

Ka vetëm punonjës të KQZ-së të cilët kujdesen dhe po shkojnë në secilën klasë për të parë nëse procesi i votimit ka përfunduar. Nuk ka më njerëz që hyjnë, nuk po shoh. Kjo qendër do të mbyllet, dhe janë mbyllur edhe qendrat e votimit në gjithë Republikën e Kosovës.

Ka dalë edhe një exit poll tjetër, Esmeralda, i Klan Kosova dhe Pipos, dhe i ka shumë të ngjashme rezultatet me ato që i the të Albanian Post. Sipas exit poll-it të Klan Kosovës, Vetëvendosja ka fituar 42.3% të votave, Partia Demokratike e Kosovës 21.6% të votave, Lidhja Demokratike e Kosovës17.3% të votave dhe Aleanca për Ardhmërinë e Kosovës 6.8% të votave.

Janë shumë të ngjashme. Do të shohim se si do të jenë këto me rezultatet paraprake që do të nisin nga ora 20:00 dhe që janë gjithmonë pa diasporën. Duhet vënë gjithmonë në dukje kjo, nuk janë votat e atyre që kanë votuar në ambasada, por as votat e atyre që kanë votuar me postë, as votat me kusht. Janë thjesht, mbi të gjitha është perceptim natyrisht është exit poll.

Por Vetëvendosja pritet, pritje e përgjithshme që do të bjerë nga rezultati i dhjetorit ku kishte 51%. Vetëm duhet parë se sa e madhe është kjo rënie’, tha ai ndër të tjera.

Është mbyllur zyrtarisht orari i procesit të votimit për zgjedhjet e parakohshme parlamentare në Kosovë. Qendrat e votimit u hapën në orën 07:00 dhe u mbyllen në orën 19:00. Procesi është cilësuar i qetë dhe pa problematika madhore. Pjesëmarrja në votim deri në orën 19:00 është 31.72%

Demokracia në Veprim, DnV pak para mbylljes së procesit të votimit u shpreh në një deklaratë për mediat tha se dalja e qytetarëve në zgjedhje është 10% më e ulët sesa dy zgjedhjet e 2025.

Dalja në votime, sipas vëzhguesve të DnV-së, deri në orën 17:00 ishte rreth 29%. Deri në orën 17:00, raste të votimit me dokumente me afat të skaduar janë hasur në 25% të vendvotimeve, deri në 4 raste. Raste të fotografimit të votës kanë qenë gjithsej 25, të hasura në 4% të vendvotimeve.

Është raportuar edhe për disa incidente që kanë të bëjnë me tentime për të votuar në emër të familjarëve të tyre.

Demokracia në Veprim, DnV pasditen e kësaj të diele ka dalë në një deklaratë për mediat ku ka zbuluar detaje nga ecuria e procesit zgjedhor në zgjedhjet e parakohshme në Kosovë. DnV në njoftim bëri me dije se dalja e qytetarëve në zgjedhje është 10% më e ulët sesa dy zgjedhjet e 2025.

Dalja në votime, sipas vëzhguesve të DnV-së, deri në orën 17:00 është rreth 29%. Dalja në votime në të njëjtën kohë në dy zgjedhjet e kaluara parlamentare të mbajtura gjatë 2025 ishte rreth 39%, pra 10% më e lartë.

Sipas DnV ka pasur disa problematika ku votuesit janë paraqitur jo në qendrat e duhura te votimit. Nga hapja e vendvotimeve deri në orën 17:00, këto vështirësi janë raportuar në 65% të vendvotimeve, me deri në 10 raste. Në rajonin e Prishtinës dhe Pejës ka patur deri në 30 raste.

Votimi me asistencë që nga mëngjesi ka mbetur përgjithësisht i njejtë, pra 0.2%, ndonëse është i përhapur në 55% të vendvotimeve. Rreth 78% të këtyre rasteve lidhen me asistimin e votueseve gra.

Votimi me asistencë nuk po evidentohet në 6% të vendvotimeve, deri në 10 raste. Komisionerët në mbi 65% të vendvotimeve kanë vazhduar të kërkojnë dokumente mjekësore nga të gjithë qytetarët që kanë kërkuar të votojnë me ndihmën e dikujt tjetër. Për me tëpër, në 45% të vendvotimeve nuk kanë lejuar që të votohet me asistencë pa dokumente mjekësore, përkundër insistimit të votuesve, sidomos në Prishtinë.

Deri në orën 17:00, raste të votimit me dokumente me afat të skaduar janë hasur në 25% të vendvotimeve, deri në 4 raste. Raste të fotografimit të votës kanë qenë gjithsej 25, të hasura në 4% të vendvotimeve.

Është raportuar edhe për disa incidente që kanë të bëjnë me tentime për të votuar në emër të familjarëve të tyre, por që të gjitha janë trajtuar nga policia në mënyrë profesionale.

Kryeministri i Kosovës, Albin Kurti pak minuta më parë ka shpërndarë në rrjetet sociale një video teksa u bën thirrje qytetarëve që të dalin dhe të votojnë në zgjedhjet e parakohshme parlamentare në vend.

Për pak orë do të mbyllet procesi i votimit teksa theksoi se ata që ende nuk kanë votuar kanë ende kohë për të vendosur për zhvillimin dhe sigurinë e Kosovës.

 “Të dashur qytetarë, Kanë mbetur më pak se 3 orë kohë për të votuar. Të gjithë ju, që ende nuk keni votuar, ju lutem ta bëni një gjë të tillë. Për pak minuta vendosim për zhvillim, siguri dhe stabilitet për vendin tonë. E ju që tashmë keni votuar, ftoni miqtë, farefisin e dashamirët të shkojnë për të votuar. Sa më e gjerë vendimmarrja aq më e fortë demokracia dhe Republika jonë.

E juve që ju ka zënë puna të jeni në komuna tjera, mund të votoni me kusht në cilëndo komunë ku jeni. Secila komunë e ka një qendër të votimit bash për këtë punë. Dil dhe voto! Pak kohë ka mbetur. Mos e le për në fund! Ju dua”, shtoi Kurti.

Ambasadori gjerman në Kosovë, Rainer Rudolph këtë të diele ndodhet në terren teksa po monitoron ecurinë e zgjedhjeve të parakohshme parlamentare në vend. Rudolph përmes një video në rrjetet sociale theksoi se po monitorojnë procesin me ekipe.

Ai theksoi se deri tani gjithçka duket e qetë dhe se procesi i votimit po zhvillohet pa problem.

‘’Përshëndetje, sot është dita e zgjedhjeve në Kosovë dhe, me vendosmërinë për të vëzhguar procesin, po marrim pjesë me katër ekipe në ushtrimin e monitorimit të zgjedhjeve të organizuar nga Zyra e Bashkimit Evropian në Prishtinë.

Aktualisht jam duke vizituar qendrat e votimit në Prishtinë dhe rrethinën e saj. Gjithçka që kam parë deri tani duket e qetë dhe po zhvillohet pa probleme. Prandaj, presim me interes rezultatet e zgjedhjeve sonte. Shihemi atëherë’’, tha ai.

Në fshatin Gorazhdec të Komunës së Pejës është vërejtur flamuri i Serbisë në Qendrën e Votimit, e cila është larguar menjëherë nga Komisioni Qendror i Zgjedhjeve.

Zëdhënësi i Policisë nga rajoni i Pejës, Fadil Gashi tha se pasi që është njoftuar Policia e Kosovës, ka raportuar KQZ-në dhe flamuri është larguar nga komisioneri i Qendrës së Votimit.

Ai tha se pas largimit të flamurit nuk ka pasur ndonjë incident dhe deri më tani situata është e qetë.

“Policia është njoftuar, e ka raportuar, ka vërejtur vetëm flamuri i Serbisë. Policia është për siguri nuk është me heq flamuj, KQZ e ka hequr. E ka vërejtur që veç flamuri i Serbisë është në vendvotimin e Gorazhdecit. Menjëherë kemi raportuar në KQZ dhe e ka larguar komisioneri. Qetë është gjithçka”, tha Gashi.

Pasardhësit e dy prej ish-krerëve të Ushtrisë Çlirimtare të Kosovës që po gjykohen në Hagë, Endrit Thaçi dhe Klestor Veseli sot kanë shfrytëzuar të drejtën e votës.

Që të dy votuan paraditen e së dielës në qendrën e votimit, saktësisht në shkollën “Faik Konica”, në Prishtinë.

Klestor Veseli, i shoqëruar nga nëna dhe vëllau, nuk pranoi të prononcohet për media. I shoqëruar nga nëna e tij ishte edhe Endriti, djali i Hashim Thaçit.

Ai për KosovaPress, tha se presin një ndryshim që duhet të ndodh.

“Presim një ndryshim i cili duhet të ndodh”, tha Thaçi. Sot në vend po mbahen zgjedhjet e parakohshme, ku qytetarët votojnë për të zgjedhur legjislaturën e re.

Ndërkohë, kujtojmë që gjykimi në Hagë ndaj ish-krerëve të UÇK-së është ende duke vazhduar.

Kryetari i Partisë Socialdemokrate, Dardan Molliqaj, ka votuar këtë të dielë në zgjedhjet parlamentare dhe ka bërë thirrje për pjesëmarrje sa më të lartë të qytetarëve në procesin zgjedhor.

Pasi ushtroi të drejtën e votës në shkollën “Iliria” në Prishtinë, Molliqaj deklaroi se sipas tij, të dhënat e Komisionit Qendror të Zgjedhjeve tregojnë një pjesëmarrje të kënaqshme të qytetarëve deri në mesditë.

“Ajo çka po shohim sot në mesditë, fluksi i qytetarëve që po votojnë dhe nga statistikat e KQZ-së, aty-aty jemi dhe ka pjesëmarrje të kënaqshme të qytetarëve të Kosovës. Unë besoj se është jetike që pas debateve dhe fushatës që ka ndodhur, sa më shumë njerëz të shkojnë në kutitë e votimit. Sa më i madh numri i qytetarëve në kutitë e votimit, aq më e madhe është garanci për demokraci. Ne besojmë që demokracia është çelësi i organizimit shoqëror dhe politik në secilin vend, e në veçanti te ne. Ftesa jonë është e qartë që secili që ka mundësi dhe vullnet të dalë të votojë, pasi kjo është garanci për një mundësi të mirë dhe zgjedhje të mira”, përfundoi ai.

Molliqaj theksoi se pjesëmarrja e lartë në zgjedhje është e rëndësishme për forcimin e demokracisë dhe legjitimitetin e institucioneve që do të dalin nga ky proces.

Kandidati për kryeministër nga radhët e Lidhjes Demokratike të Kosovës, Lumir Abdixhiku, ka votuar këtë të diel në zgjedhjet parlamentare, i shoqëruar nga bashkëshortja e tij, në shkollën “Faik Konica” në Prishtinë.

Pas votimit, Abdixhiku u bëri thirrje qytetarëve që të dalin masivisht në zgjedhje dhe të ushtrojnë të drejtën e tyre të votës.

Ai theksoi se zgjedhjet janë një moment i rëndësishëm për demokracinë dhe të ardhmen e vendit, duke i cilësuar si “festë të demokracisë dhe shprehjes së lirë të vullnetit të qytetarëve të Kosovës”.

“Zgjedhjet janë festë për popullin tonë. Janë festë e demokracisë, shprehjes së lirë të vullnetit të popullit të Kosovës. Siç kemi dëshmuar tash e sa kohë dhe tash shpesh kohët e fundit, Kosova organizon zgjedhje të mira, të mbara dhe demokratike. Sot presim këtë ditë të mirë të kemi zgjedhje të mira dhe demokratike”, deklaroi ai.

Ai shtoi se brenda ditës së votimit vendoset fati i qeverisjes për katër vitet e ardhshme.

“Sot është një ditë ku brenda 12 orëve vendoset fati i republikës për katër vitet e ardhshme. Në këtë drejtim pres pjesëmarrje masive të qytetarëve të Kosovës”, u shpreh Abdixhiku.

Vjosa Osmani, kandidate për presidente nga radhët e Lidhjes Demokratike të Kosovës (LDK), sapo ka hedhur votën e saj.

Osmani para mediave ka thënë se ka optimizëm që zgjedhjet e sotme do ta shtrojnë rrugën drejt formimit të institucioneve dhe daljes së vendit nga kriza.

“Jam e bindur që me votën e qytetarëve sot do të mundësohet rruga drejt formimit të institucioneve dhe daljes nga kriza. Kam optimizëm të madh që sot vota e qytetarëve do ta nxjerrë vendin nga kriza”, tha Osmani.

Këtë të dielën po mbahen zgjedhjet e parakohshme parlamentare në Kosovë, ku qytetarët po ushtrojnë të drejtën e tyre të votës në të gjithë vendin.

Në qendrën e votimit “Sveti Sava” në Mitrovicën e Veriut është raportuar një rast i veçantë gjatë procesit zgjedhor, ku një votuese me origjinë serbe ka ushtruar të drejtën e saj të votës e veshur me vello.

Ngjarja është vënë re gjatë votimit në këtë qendër, ndërsa procesi zgjedhor po zhvillohet normalisht.

Ndërkohë, sipas Komisionit Qendror të Zgjedhjeve, të drejtën e votës e kanë 2.092.174 qytetarë. Votimi organizohet në 949 qendra votimi me 2.550 vendvotime në të gjithë Kosovën. KQZ ka bërë të ditur se këto janë zgjedhjet e 11-ta në nivel nacional që nga përfundimi i luftës.

Në garë marrin pjesë 22 parti politike dhe tre koalicione parazgjedhore. Vetëvendosje garon në koalicion me Guxo, Alternativën dhe Partinë Shqiptare Demokristiane, ndërsa PDK-ja, LDK-ja dhe AAK-ja konkurrojnë të vetme. Pjesë e kësaj gare është edhe ish-presidentja e vendit, Vjosa Osmani, e cila i prin listës për deputetë të LDK-së, partisë ku ishte pjesë përpara mandatit presidencial.

E vetme garon edhe Lista Serbe, partia më e madhe e serbëve të Kosovës, e cila mbështetet nga Beogradi zyrtar.

Një ditë më parë ka votuar diaspora në përfaqësitë diplomatike të Kosovës. Sipas të dhënave zyrtare, nga 27.724 votues të regjistruar jashtë vendit kanë votuar 22.414 qytetarë, ose 80.85% e tyre. Procesi është zhvilluar në 30 përfaqësi diplomatike, përfshirë ambasada dhe konsullata në Evropë, SHBA dhe Kanada.

Kreu i Komisionit Qendror të Zgjedhjeve, Kreshnik Radoniqi, ka qenë i pari që ka hedhur votën në kutitë e zgjedhjeve ditën e sotme.

Ai votoi në shkollën fillore “Lidhja e Prizrenit” në Pejë dhe pas votimit ai u bëri thirrje qytetarëve të Kosovës që të dalin dhe të shfrytëzojnë të drejtën e tyre kushtetuese për të votuar.

“Sot fillon dita e zgjedhjeve dhe për këtë ditë KQZ ka qenë e angazhuar që nga shpallja e saj për përgatitjet. Të gjitha përgatitjet deri më sot pothuajse kanë përfunduar, tash fillon procesi zgjedhor dhe më pas fillon numërimi në të gjitha qendrat komunale të numërimit. I bëj thirrje të gjithë qytetarëve të Republikës së Kosovës që të dalin dhe të shfrytëzojnë të drejtën e tyre kushtetuese për të votuar, me zgjedhjen e tyre do të zgjedhin përfaqësuesit për Kuvendin e Republikës së Kosovës”, ka deklaruar Radoniqi.