Aksident i rëndë në Cërrik, makinat përplasen “kokë më kokë”! Rregjistrohen dy viktima

Një aksident i rëndë me pasojë vdekjen e dy personave ka tronditur mbrëmjen e kësaj të marte banorët e fshatit Qyrkan, në Njësinë Administrative Gostime të Bashkisë Cërrik.

Ngjarja e rëndë ka ndodhur pas përplasjes së fuqishme “kokë më kokë” të dy automjeteve. Sipas informacioneve paraprake, impakti ka qenë i fortë, duke shkaktuar dëmtime të rënda në të dy mjetet, ndërsa njëri prej tyre ka përfunduar jashtë rrugës pas përplasjes.

Dy persona kanë humbur jetën në vendngjarje, ndërsa viktimat janë Q. Ç., rreth 63 vjeç dhe si dhe pasagjeri në automjetin e tij, shtetasi D. T., rreth 22 vjeç.

Menjëherë pas aksidentit në Qyrkan kanë mbërritur shërbimet e emergjencës, efektivë të policisë dhe grupi hetimor, të cilët kanë nisur punën për dokumentimin e plotë të rrethanave të ngjarjes.

Paraprakisht dyshohet se përplasja mund të ketë ardhur si pasojë e humbjes së kontrollit mbi drejtimin e automjeteve ose një manovre të gabuar gjatë lëvizjes, ndërsa pritet që hetimet të përcaktojnë dinamikën e saktë të aksidentit.

Aksidentet rrugore mbeten një nga problematikat më shqetësuese në vend, ndërsa autoritetet vijojnë apelat ndaj drejtuesve të mjeteve për kujdes maksimal, respektimin e rregullave të qarkullimit dhe shmangien e shpejtësisë së lartë.

Njoftimi i plotë i policisë:

Në aksin rrugor “Mollas–Gostimë”, janë përfshirë në një aksident rrugor automjeti me drejtues shtetasin S. M., 38 vjeç, dhe automjeti me drejtues shtetasin Q. Ç., rreth 63 vjeç.

Si pasojë e përplasjes, kanë humbur jetën drejtuesi i automjetit, shtetasi Q. Ç., si dhe pasagjeri në automjetin e tij, shtetasi D. T., rreth 22 vjeç.

Gjithashtu, është dëmtuar drejtuesi i automjetit tjetër, shtetasi S. M., i cili është transportuar në spital dhe ndodhet nën kujdesin e mjekëve.

Grupi hetimor, nën drejtimin e Prokurorisë, po kryen veprimet procedurale dhe vijon punën për zbardhjen e plotë të rrethanave dhe shkaqeve të aksidentit.