Irani: Kemi nisur sulme të reja ndaj objekteve amerikane në Gjirin Persik

Irani njoftoi se ka nisur një valë të re sulmesh ndaj objekteve amerikane në Gjirin Persik, pas natës së gjashtë radhazi të operacioneve ushtarake amerikane kundër objektivave iraniane. Përplasjet e fundit vijnë ndërsa armëpushimi i muajit të kaluar është zëvendësuar nga sulme dhe kundërsulme të përditshme.

Komanda Qendrore e SHBA-së (CENTCOM) bëri të ditur se forcat amerikane zhvilluan një tjetër seri sulmesh për të “degraduar më tej aftësitë ushtarake iraniane”, duke goditur objektiva në ishullin Qeshm dhe pranë Bandar Abbas, ku ndodhen porti më i madh i Iranit dhe baza të rëndësishme të marinës dhe Gardës Revolucionare.

Sipas deklaratës së CENTCOM-it, avionë luftarakë, dronë dhe anije luftarake përdorën municione precize për të goditur dhjetëra objektiva ushtarake, përfshirë sisteme të mbikëqyrjes bregdetare, mbrojtjes ajrore, infrastrukturë logjistike dhe kapacitete detare.

Nga ana tjetër, Irani ka vijuar sulmet me raketa dhe dronë ndaj bazave ushtarake amerikane në vendet fqinje. Ushtria iraniane deklaroi se në orët e para të së premtes goditi objekte amerikane në Bahrein dhe Kuvajt, ndërsa më herët kishte shënjestruar edhe një bazë ajrore amerikane në Jordani.

Në Doha të Katarit u raportuan shpërthime, ndërsa Ministria e Brendshme bëri të ditur se një fëmijë u plagos nga copëzat e predhave.

Mediat iraniane raportuan gjithashtu se sulmet amerikane goditën pesë ura, stacionin hekurudhor në Bandar Khamir dhe aeroportin Iranshahr në juglindje të vendit.

Sipas agjencisë shtetërore iraniane IRNA, shtatë persona humbën jetën nga sulmet amerikane ndaj urave në Bandar Khamir, një qytet portual në jug të Iranit.