“Po tregon paaftësi”, PD-ja tjetër thirrje Ramës: Mirato paketën socio-ekonomike për qytetarët në nevojë

Partia Demokratike me anë të një deklarate për mediat ka reaguar për masat që po ndërmerr qeveria për t’u përballur me përhapjen e pamëshirshme të COVID-19 në Shqipëri. Selia blu thekson se ka përkrahur çdo masë agresive kundër përhapjes së shpejtë të coronavirusit, por ka zgjedhur të mos pajtohet me vendimin e qeverisë, sipas të cilit, lëvizja e automjeteve të atyre që janë në punë do të lejohet një orë në mëngjes dhe një orë pasdite, duke filluar nga dita e nesërme.

 Kjo masë shton Partia Demokratike nuk  i shërben zgjidhjes së situatës, por vetëm drejtorëve të kryeminsitrit Edi Rama.

“Partia Demokratike ka përkrahur çdo masë agresive kundër përhapjes së koronavirusit, por vendimi i fundit i qeverisë virtuale të Edi Ramës për qarkullimin e makinave nuk i shërben këtij qëllimi”,  thuhet në deklaratën e PD-së.

Sipas tyre, vendimi virtual i qeverisë shqiptare  tregon qartë paaftësinë në përballimin e gjendjes së krijuar.

“Lejimi i lëvizjes së automjeteve në mëngjes dhe 1 orë pasdite zgjidh vetëm lëvizjen me makinë të drejtorëve të Edi Ramës. Është një vendim që tregon paaftësinë e qeverisë në menaxhimin e situatës dhe pandjeshmërinë e saj”, thekson PD-ja.

Mes rreshtave, Partia Demokratike kërkon që kryeministri Edi Rama të mos kërkojë saktrifica vetëm të qytetarëve, por të hartojë menjëherë paketën e mbështetjes sociale dhe ekonomike për qytetarët në nevojë.

“Është koha që Edi Rama të mos kërkojë sakrifica vetëm nga qytetarët. Për të përballuar qendrimin e qytetarëve në shtëpi, shteti duhet të rimbursojë të plotë pagën e tyre. Në vend që të bëjë mjekun, sanitarin, policin apo ushtarin, Edi Rama duhet të bëjë tani Kryeministrin! Të miratojë paketën social ekonomike, që përfshin, ndër të tjera:

1-Riimbursimin e bizneseve

2-Rimbursimin e pagës së punonjësve

3-Ndihmën për të papunët dhe familjet në nevojë

Jeta e shqiptarëve nuk ka çmim!”, thekson PD-ja.