Vendimet që parlamenti miratoi me nxitim pas zgjedhjeve të 25 prillit

Pas zgjedhjeve të 25 prillit, parlamenti vijoi veprimtarinë e tij edhe për 65 ditë.

Në 10 seanca të zhvilluara, ligjvënësit miratuan një sërë vendimesh mes të cilave, akte që kërkonin ndihmën edhe të opozitës në largim.

Vendimi më i rëndësishëm ishte ai i shkarkimit të presidentit Ilir Meta, ku shumica socialiste përshpejtoi procedurat për kreun e shtetit, me ndihmën e votave të deputetëve që në vitin 2019 u bënë pjesë e parlamentit, pas djegies së mandateve nga ana e PD-së dhe LSI-së.

Në seancën e 9 qershorit me 104 vota, parlamenti shkarkoi nga detyra presidentin Ilir Meta.

Por, shkarkimi i kreut të shtetit nuk ka qenë i vetmi.

PS në seancën e fundit zgjodhi edhe kryetaren e Autoritetit të Medias Audiovizive, pavarësisht thirrjeve të ndërkombëtarëve në Tiranë, për ta shtyrë miratimin në sesionin e ri.

Zgjedhja e anëtarëve zëvendësues të Komisionerit Publik dhe Komisionit të Pavarur të Kualifikimit, me 92 vota ishte një tjetër hap që PS mori, duke e miratuar në fund të këtij 4-vjeçari.

Pjesë e vendimeve, ka qenë edhe zgjedhja e katër anëtarëve të Këshillit Drejtues të Radio Televizionit Shqiptar me mbi 90 vota.

Të gjitha këto vendime kërkonin shumicë të cilësuar për t’u miratuar. E nëse mazhoranca do të priste parlamentin e dalë nga zgjedhjet e 25 prillit, do ta kishte të vështirë zgjedhjen e disa anëtarëve apo shkarkimin e presidentit.

LEXONI GJITHASHTU:

• Oerd Bylykbashi: Reformë të thellë zgjedhore, ndryshim të sistemit
• Gjykata Kushtetuese rrëzon mënyrën e shpërndarjes së mandateve, shfuqizon kriterin e herësit
• Kodi Zgjedhor, ‘Kushtetuesja’ cakton seancën për kërkesën e Bindjes Demokratike dhe partisë së Murrizit