Senatorët spanjollë miratojnë që nga shtëpitë anëtarësimin e Maqedonisë së Veriut në NATO

Senati spanjoll ka mbajtur një seancë plenare sot për të votuar pranimin e Maqedonisë së Veriut në NATO.

Duke qenë vendi i fundit që pritej ta merrte këtë vendim, miratimi konfirmon hyrjen e Maqedonisë së Veriut në Aleancën e Atlantikut Verior.

Tani pritet vetëm miratimi në parlamentin e Maqedonisë së Veriut dhe dorëzimi i kërkesës në Uashington, pas së cilës do të merret vendimi formal deri në fund të muajit.

Kjo do të thotë që viti 2020 mund të sjellë për vendin fqinj jo vetëm hapjen e negociatave, por edhe hyrjen në NATO.

Për herë të parë në histori, vota e senatorëve u mbajt me video-konferencë, për shkak të rrezikut që po shfaq coronavirusi COVID-19 në Spanjë.

Votimi u krye nëpërmjet një sistemi kompjuterik dhe senatorët votuan nga shtëpia.

Në sallë ishte vetëm një senator, dhe një nga anëtarët e kryesisë ishte me maskë.

Spanja është vendi i katërt në botë që është prekur më shumë nga coornavirusi COVID-19, dhe ditët e fundit kanë pasur një rritje të numrit të të infektuarve dhe të të vdekurve.

Numri i të prekurve në total ka shkuar në mbi 10 mijë, dhe të vdekurit kanë arritur 491.

Policia ka nisur të vërë në zbatim masa shumë të rrepta nëpër territor, sidomos në pikat kufitare.