Kush do ta zëvendësojë Ruçin në Fier? Petro Koçi komenton në Euronews Albania

Deputeti i zgjedhur i Partisë Socialiste, z. Petro Koçi vlerësoi në një intervistë për Euronews Albania rolin e kolegut të tij Gramoz Ruçi në politikë, ndërsa u pyet gjithashtu për zëvendësimin e tij në bastionin socialist të Fierit.

“E kam quajtur një akt burrëror dorëheqjen e z. Ruçi edhe pse nuk e prisnim. Ai përfaqëson një përvojë të jashtëzakonshme politike, e cila duhet shfrytëzuar sidomos në rastin e qarkut ku ka qenë protagonist për shumë vjet. Z. Ruçi është një mbret sa i përket modestisë, qëndrueshmëri të jashtëzakonshme politike, pjekuri dhe ka thënë fjalën e duhur atje ku duhet”, u shpreh z. Koçi.

Deputeti i PS nuk dha një emër se kush do ta zëvendësojë z. Ruçi për mandatin e deputetit në qarkun Fier.

“Besoj do të merret një vendim i duhur, ndaj jemi në pritje,” tha drejtuesi i PS Fier.

Ruçi e dha lajmin për tërheqjen nga politika më 12 qershor në Kongresin e jashtëzakonshëm të Partisë Socialiste në moshën 69-vjeçare.

I pyetur nga gazetarja e Euronews Albania, Esmeralda Mulaj nëse deputeti planifikon të jetë pjesë e qeverisë, Koçi u përgjigj se nuk preferonte karriget qeveritare.

Koçi u ftua në studio pasi denoncoi se në qarkun e Fierit krimi kishte shtrirë duart në financat publike përmes fitimit të tenderëve dhe i bëri thirrje institucioneve shtetërore ta parandalojnë këtë fenomen shqetësues.

LEXONI GJITHASHTU:

Petro Koçi: Krimi po përdor këto tre mënyra për të përfituar nga tenderat publikë