Dy të arrestuar dhe dy të tjerë në kërkim për trafik heroine drejt vendeve të BE-së

Struktura e Posaçme Anti-Korrupsion (SPAK) njoftoi ditën e sotme për arrestimin e dy personave të akuzuar për trafik ndërkombëtar të heroinës si dhe shpalljen në kërkim të dy të tjerëve.

Në njoftimin për shtyp SPAK tha se janë arrestuar Dëfrim Çela, Irfan Sulaj, – të akuzuar si drejtues të grupit, – ndërsa mbeten në kërkim F.Xh dhe R.Sh.

Më 19 korrik Gjykata vendosi si masë sigurie arrestin me burg për të katër këta persona, vendim që u ekzekutua po atë ditë nga policia për të paktën Çelën dhe Sulajn.

SPAK thotë se ka nisur hetim edhe për pasurinë e të katër të akuzuarve me dyshimin se mund të jetë ngritur si rrjedhojë e pastrimit të parave.

Hetimet për këtë grup nisën në kuadër të operacionit policor “Kujtesa”, një operacion i ndërmarrë në bashkëpunim me autoritetet greke dhe veriomaqedone.

Policia dyshon se prej vitit 2016 grupi kishte zhvilluar një strukturë të transportit të heroinës drejt Greqisë dhe vendet e tjera të Bashkimit Evropian.

LEXONI GJITHASHTU:

• Një shqiptar pas grupit kolumbian që dërgonte kokainë në SHBA përmes fluturimeve “charter”
• Sekuestrohen 6 tonë kokainë në Kolumbi, operacion i ushtrisë në xhungël kundër fraksioneve rebele
• Kapen 14 pako me rreth 12 kilogramë kokainë në portin e Durrësit