Burimet spitalore konfirmojnë për Euronews Albania: Shkon në 35 numri i të shtruarve te Infektivi

Shqipëria vijon të përballet me përhapjen e pandemisë së infeskionit COVID-19. Teksa ditët kalojnë, numri i të infektuarve ka ardhur në rritje duke shtuar edhe fluksin e punës së mjekëve pranë Spitalit Infektiv në QSUT.

Burimet spitalore i thanë sot Euronews Albania se tre pacientë të tjerë janë shtruar në Spitalin Infektiv duke e çuar numrin në 35. Ministria e Shëndetësisë në të dhënat e saj ka raportuar se numri i të prekurve deri ditën e djeshme ka qenë 64 persona.

Shqipëria ka nisur të marrë masa drastike për të përballur përhapjen e mëtejshme të COVID-19, ndërsa qeveria ka prezantuar mbrëmjen e djeshme një plan mbështetës me shtatë pika për bizneset dhe për individët, të cilët kanë mbyllur veprimtaritë e tyre për shkak të masave shtrënguese të strukturave shtetërore.