Mbi 13 mijë persona të vaksinuar në 24 orë sipas ministres së Shëndetësisë

Ministrja e Shëndetësisë, Ogerta Manastirliu thotë se më shumë se 13 mijë qytetarë janë vaksinuar këtë të premte, ndërsa janë 1,123,253 vaksinime të kryera në total.

Duke theksuar rrezikun e përhapjes së shpejtë të variantit “Delta” të COVID-19, znj. Manastirliu ftoi qytetarët që të vaksinohen gjatë fushatës “java e hapur e vaksinimit +18 vjeç”.

“Nëse jeni mbi 18 vjeç, shfrytëzoni fundjavën për t’u vaksinuar nga mëngjesi deri në 8 të mbrëmjes, në qendrat shëndetësore ose në qendrat e vaksinimit të përqendruar kudo në vend”, apelon znj. Manastirliu.

Ministrja bëri me dije se ditën e hënë do të mbërrijnë në vendin tonë 44 mijë doza të vaksinës Pfizer, ndërsa pritet që vendi të furnizohet me vaksina edhe në vijim përmes kontratave të lidhura.

Vaksinimi i hapur do të vijojë deri ditën e diel nga ora 08:00-20:00 në qendrat shëndetësore dhe në qendrat e vaksinimit të përqendruar në të gjithë vendin.

Nga mbi 1.1 milionë vaksinime janë rreth 484 mijë qytetarë që i kanë marrë të dy dozat vaksinës anti-COVID.

Shqipëria nisi në datë 11 Janar 2021 fushatën e vaksinimit ku qendra e parë u hap në Tiranë, në stadiumin ‘Air Albania’.

LEXONI GJITHASHTU:

• Ministria e Arsimit sqaron për Euronews Albania: Mësuesit, jo të detyruar të vaksinohen për shtatorin
• 44 mijë doza Pfizer mbërrijnë në Shqipëri të hënën
• 31 raste të reja me COVID-19 në 24 orët e fundit