Cirku Kombëtar pa çadër, vendimi për lirimin e truallit pa prezencën e palës mbrojtëse

Vendimi që Cirku Kombëtar të lirojë truallin është marrë pa qenë prezentë përfaqësia e tyre. Sipas artistëve pala mbrojtëse, në këtë rast Ministria e Kulturës nuk ka pasur informacion për mbajtjen e seancës gjyqësore mbi pronësinë e truallit ku ndodhet Çadra e Cirkut.

“Ka marrë një sipërfaqe toke prej 1073 metrash ku ndodhet çadra e Cirkut Kombëtar. Prej ditësh ne kemi bërë publike edhe në media një fenomen dhe një problem të tillë, ku kemi parë që nuk është mbrojtur dhe nuk është paraqitur në seancën gjyqësore pala e Ministrisë së Kulturës”, tha Julian Kazazi, kryetar i Sindikatës së Artistëve.

Në një takim të zhvilluar me sekretaren e përgjithshme të Ministrisë së Kulturës, këtë të hënë, ata kanë vendosur që këtë problem të kahershëm ta adresojnë në të gjitha hallkat e gjyqësorit.

“Duke qenë se Ministria e Kulturës nuk ka marrë informacionin në kohën e duhur, jemi brenda afateve për ta apeluar vendimin e 2019, që i takon 1073 metrave tokë. Nëse e kthejmë në vlerë monetare, janë 5 mln euron pronë publike, e qytetarëve shqiptarë, jo e Cirkut Kombëtar. Do t’i drejtohemi edhe SPAK, sepse normalisht nuk mund të  bëhet një gjyq për një pronë 5 mln euro dhe askush të mos dijë asgjë në këtë vend “, u shpreh Xhejms Kodra, akrobat.

Një javë më parë zyra e përmbarimit, kërkoi uljen e çadrës dhe lirimin e truallit ndaj pronarit, si dhe vendosi bllokimin e buxhetit të cirkut, ndërsa vetë artistët për këtë problem, që e lë cirkun pa një vend, nisën një shkresë zyrtare në Kryeministri dhe Presidencë.