KLSH kallëzon në SPAK 5 funksionarë të Ministrisë së Brendshme për abuzim me tenderët

Kontrolli i Lartë i Shtetit pas një kontrolli financiar në Ministrinë e Brendshme, duke i kushtuar vëmendje të posaçme çështjeve që lidhen me aktivitetin ekonomiko-financiar të saj për vitet e fundit, ka bërë kallëzim për 5 funksionarë të saj për abuzim me tenderët.

Sipas KLSH, auditi ka zbuluar shkelje të ligjit në procedurat e prokurimit publik duke sjellë cenimin e barazisë së pjesëmarrësve dhe operatorëve ekonomik.

Gjithashtu ka pasur rritje të paargumentuar të vlerës së kostove të ndërtimit dhe kostove të projektimit të disa objekteve të Policisë së Shtetit, ku përfshihen Drejtoria Vendore e Policisë Vlorë, Komisariati i Policisë Nr.4 Tiranë, Komisariati i Policisë Pogradec dhe Komisariati i Policisë Mirditë.

KLSH ka bërë kallëzim në Prokurorinë e Posaçme Kundër Korrupsionit dhe Krimit të Organizuar ndaj 5 funksionarëve të Ministrisë së Brendshme duke i cilësuar përgjegjës për vlerësimin e ofertave në tender.