Një viktimë dhe dyfish i mesatares së infektimeve javore nga COVID-19 në Kosovë

Një person i prekur nga COVID-19 humbi jetën të shtunën në Kosovë teksa autoritetet raportuan 352 raste të tjera me infektim nga virusi.

Ministria e Shëndetësisë tha se viktima ishte nga Prizreni. Prej nisjes së pandemisë në Kosovë kanë humbur jetën si pasojë e sëmurjes nga COVID-19 rreth 2,300 persona.

Autoritetet thanë se pas 5,204 testimesh të kryera gjatë 24 orëve të fundit 352 persona rezultuan pozitivë – pozitiviteti 6.7%. Shumica e të prekurve janë të moshës 20-49 vjeç.

Tashmë numri i rasteve aktive ka shkuar në 1,659 vetë. Vlen të thuhet se kjo është dita me më shumë raste gjatë periudhës së verës duke tejkaluar dhe të premten që pati 271 infektime të reja.

Krahasuar me mesataren javore (142 raste), dita e sotme rezulton me mbi dyfishin e rasteve. Sa i përket të shëruarve, është njoftuar për 13 pacientë që tashmë e kanë kaluar COVID-19.

Prej nisjes së pandemisë në Kosovë janë pikasur rreth 110 mijë raste me COVID-19, prej të cilave 96.5% janë mundur të shërohen, 2% nuk ia kanë dalë mbanë, ndërsa 1.5% mbeten me mbartje të virusit.

Autoritetet janë munduar të testojnë sa më shumë qytetarë – ku vetëm gjatë ditës së sotme janë kryer 9,590 injeksione. Aktualisht janë kryer mbi 487 mijë injeksione, me të cilat janë vaksinuar me dy doza mbi 166 mijë qytetarë.

LEXONI GJITHASHTU:

• Shqipëria, Kosova dhe RMV me raportin më të lartë të vdekjeve të shtuara gjatë pandemisë
• Tjetër viktimë nga COVID-19 në Shqipëri, dita e tretë me mbi 130 të infektuar
• Kosova shqyrton mundësinë e vendosjes së kufizimeve për të pa-vaksinuarit