LDK thirrje Kurtit të parandalojë ndërtimin e universitetit paralel në veri të Kosovës

Lidhja Demokratike e Kosovës ka dënuar nisjen e punimeve nga Serbia për ndërtimin e “Universitetit të Prishtinës me seli të përkohshme në Mitrovicën e Veriut”.

Ajo thotë se më këtë veprim është delegjitimuar shteti i Kosovës dhe është nëpërkëmbur edhe identiteti i Universitetit të Prishtinës.

Partia e drejtuar nga Lumir Abdixhiku bën përgjegjëse qeverinë Kurti, duke thënë se kjo e fundit po rigjallëron dalëngadalë, por me hapa të sigurt strukturat paralele serbe në Mitrovicën e Veriut.

“Është Qeveria Kurti ajo e cila po i ringjallë e rigjallëron strukturat paralele dhe që dalëngadalë, por me hapa të sigurt, po i rikthen proceset prapa dhe po e ri-instalon Serbinë në Kosovë”, thuhet në reagim.

Kritika LDK-ja ka drejtuar edhe ndaj zëvendësministrit të Arsimit, Dukagjin Popovci i cili, siç thuhet, ka deklaruar se “ai universitet nuk është një strukturë paralele”.

Mes tjerash, LDK-ja thotë se kryeministri Albin Kurti duhet të ”heqë dorë nga deklaratat boshe të bëra në Bruksel” dhe të parandalojë ndërtimin e universitetit në Mitrovicën e Veriut.