Dy avionë me 182 shtetas të tjerë afganë mbërritën të dielën në Shqipëri

Dy avionë të tjerë me 182 shtetas afganë mbërritën të dielën në vendin tonë. Ministria e Jashtme bën me dije se në orën 3.50 të mëngjesit mbërriti në Rinas avioni me 154 pasagjerë, nga të cilët 108 u strehuan më Qytetin Studenti dhe pjesa tjetër në Durrës.

Ndërkohë, një tjetër avion me 28 pasagjerë mbërriti pak orë më vonë. Këta të fundit u strehuan në ambientet e Qytetit Studenti.

Deri të dielën në vendin tonë kanë mbërritur 5 avionë me 457 shtetas afganë të larguar pasi vendi ra në duart e talebanëve.

Pak ditë më parë Kryeministri Edi Rama tha në një intervistë për mediat ndërkombëtare se rreth 4000 afganë pritet të strehohen në Shqipëri.

Ardhja e shtetasve afganë ka shkaktuar reagim në opinionin publik në Shqipëri, ku disa e kanë parë si një gjest humanitar të nevojshëm, ndërsa të tjerë e kanë komentuar si ‘nder të sforcuar kërkuar nga SHBA’. Rama i ka mohuar akuzat duke thënë se “Shqipëria po e bën këtë veprim si përgjegjësi e një shteti anëtar i NATO-s”.

LEXONI GJITHASHTU:

• “Të kënaqur me mikpritjen, por nuk duam të rrimë gjatë”, dita e parë e afganëve në Tiranë
• Frika nuk ndal afganët, pas shpërthimeve nisën sërish drejt aeroportit të Kabulit