Zgjerohet vatra e zjarrit në Malin e Thatë, rrezikohet Parku Kombëtar

Vatra e zjarrit në Malin e Thatë, në Pogradec është zgjeruar gjatë natës, teksa ka prekur edhe Parkun Kombëtar të Galiçicës.

Sipas të dhënave, një grup pune prej 10 personash ka shkuar që në orët e para të mëngjesit drejt zonës ku ka rënë zjarri, ndërsa janë nisur edhe punonjës të zjarrfikëses, emergjencave civile, ndërmarrjes së punëve publike, nga zonat e mbrojtura dhe vullnetarë, banorë të zonës.

Sipërfaqja e përshkuar nga flakët është e madhe dhe zjarri po i afrohet pyjeve me dushk. Është kërkuar ndihmë edhe në komunën e Ohrit, por deri tani nuk ka asnjë konfirmim nëse kanë nisur forca zjarrfikëse.

Zjarri vijon prej 4 ditësh në këtë zonë, ndërsa në 24 orët e fundit për shkak të erës ka marrë përhapje të madhe. Mendohet se zjarri ka qenë i qëllimshëm nga barinjtë e zonës së Malit të Thatë për kullota të reja, por ka dalë jashtë kontrollit.

LEXONI GJITHASHTU:

Parku Kombëtar i Prespës, në flakë prej tre ditësh