Raportet Shkup-Athinë, Dendias: Greqia mbështet anëtarësimin e RMV-së në BE

Raportet bilaterale mes Maqedonisë se Veriut dhe Greqisë janë përmirësuar në mënyrë të qëndrueshme që në momentin kur të dyja vendet arritën një marrëveshje për ndryshimin e emrit të vendit ballkanik. Gjatë vizitës së ministrit të Jashtëm grek, Nikos Dendias në Shkup, diplomati nënvizoi se Athina mbështet objektivin e shtetit fqinj për t’u bërë pjesë e BE.

Por zbatimi i plotë i marrëveshjes se 2019 është një parakusht jetik. Dendias tha se Shkupi ka ndërmarrë “hapa të rëndësishëm” nën këtë drejtim, por shtoi se “mbetet një terren i rëndësishëm për zbatimin korrekt të saj”.

Ministri i Jashtëm grek falënderoi Maqedoninë e Veriut që ishte krah Bashkimit Evropian në aspektin e ligjit ndërkombëtar, pasi Maqedonia e Veriut ka respektuar të gjitha deklaratat e BE-së për çështjen e shfrytëzimit të ujërave në Mesdhe.

Takimi mes dy homologëve u përqendrua në bashkëpunimin dypalësh në ekonomi, investime tregti, energji, transport dhe menaxhimin e pandemisë COVID-19.

Ministri i Jashtëm i Maqedonisë së Veriut, Bujar Osmani, theksoi se Marrëveshja e Prespës është baza e marrëdhënieve dypalëshe dhe arkitekturës së re ndërkombëtare.

“Është në interesin e vendit tonë, garanton perspektivën e shtetit dhe atë dypalëshe”, u shpreh Osmani në konferencën e përbashkët për mediat.

Si pjesë e marrëveshjes për ndryshimin e emrit, qeveria në Shkup zbatoi shumë ndryshime praktike, filloi lëshimin e pasaportave dhe kartave të identitetit me emrin Maqedonia e Veriut.

Por një pengesë e re është shfaqur për Maqedoninë së Veriut e cila dëshiron të anëtarësohet në BE. Fqinji i saj lindor Bullgaria, si Greqia, tashmë anëtare e BE-së, kundërshton anëtarësimin e vendit, duke pretenduar një mosmarrëveshje dypalëshe mbi historinë dhe identitetin kombëtar.

LEXONI GJITHASHTU:

• Integrimi i Shqipërisë dhe RMV-së në BE, komenton Albert Gajo dhe analisti Meziri
• Integrimi i RMV-së, analisti Musliu: Po të ishte për meritokraci, negociatat duhet të kishin filluar