Kryeministri Rama: S’ka të ardhme të Evropës pa Ballkanin në BE

Kryeministri i Shqipërisë, Edi Rama ishte shumë i drejtpërdrejtë gjatë fjalës në “Forumin Strategjik të Bled” që po mbahet në Slloveni, kur foli për integrimin në BE.

Ai tha se Evropa nuk ka asnjë të ardhme nëse nuk anëtarësohen vendet e Ballkanit Perëndimor në BE.

“Ne jemi Evropë dhe nuk ka asnjë të ardhme të Evropës pa Ballkanin në BE. Ne mund të qeshim edhe kur vuajmë, çfarë pjesëtarët e BE nuk janë në gjendja ta bëjnë. Nëse BE do vijojë kështu, natyrisht nuk do jetë mirë për ne, por do jetë më keq për BE, më besoni”, tha Rama.

Shefi i qeverisë shqiptare u shpreh se qasja që po ndjek Evropa sa i takon integrimit nuk ka lidhje me ëndrrën e etërve që krijuan BE.

“Ju përmendët në fillesë etërit themelues dhe nuk mund të rri pa thënë që nëse do çoheshin etërit themelues dhe do ndiqnin këtë diskutim për të ardhmen e Evropës, besoj se do thonin se “do ishim më mirë vdekur se sa gjallë”. Nuk kam provë, por po kthehen përmbys në varr”, tha Rama.

Po ashtu Rama u kërkoi përfaqësuesve të BE-së të mos përmendin më ndikimin e faktorëve të tretë në Ballkan, duke thënë se një pohim i tillë është qesharak.

“Ju lutem, mos përmendi më aktorë dhe faktorët e tretë, sepse është shumë qesharake”, tha.

Në fund Rama kishte një kërkesë edhe për presidentin e Bullgarisë, të cilit i kërkoi të heqë dorë nga vetoja në mënyrë që Shqipëria dhe Maqedonia e Veriut të nisin procesin integrues me BE.

“Do t’i kërkoj presidentit të Bullgarisë: Ju bullgarët mos jini kaq tipik të BE, bëhuni ballkanas, hapni rrugën bisedimeve. Na lini të flasim me ta dhe ju pastaj mund të bëheni ballkanik dhe të dilni dhe të bëni pengesa”, tha Rama.

LEXONI GJITHASHTU:

• Albin Kurti shpalos dy arsye pse duhet integrimi i Ballkanit në BE
• Presidenti i Sllovenisë kundërshton idenë për ndryshim kufijsh në Ballkan