Më i votuari nga socialistët në zgjedhjet e 25 prillit, Balla mbetet pa post në qeveri

Taulant Balla nuk do të jetë më sekretar i përgjithshëm i Partisë Socialiste, edhe pse nuk shprehet i mërzitur për këtë pasi do të vijojë të mbajë rolin e kreut të grupit parlamentar socialist të cilin e vlerëson si më të rëndësishëm.

“Nuk e mendoj që të jesh kryetar i grupit parlamentar të shumicës parlamentare në mandatin e tretë do të thotë të mos jesh në pozicion të rëndësishëm”, u shpreh për mediat Balla.

Ai nuk do të jetë më as në krye të PS në qarkun e Elbasanit, ku mori numrin më të madh të votave preferenciale në zgjedhjet e prillit 2021 dhe ku ka shërbyer si deputet në parlamentet e dala nga tre zgjedhjet e fundit parlamentare. Për këtë mandat, ai do të drejtojë socialistët e qarkut Fier.

Balla iu bashkua Partisë Socialiste në vitin 2002, dhe mori karrigen e deputetit socialist vetëm tre vjet më vonë në zgjedhjet e 2005-ës, ku garoi për qarkun e Librazhdit.

Ai u votua nga Partia Socialiste për të qenë në krye të grupit parlamentar në 2017-ën pas propozimit nga Kryeministri Rama.

Vetëm pak kohë më pas, me dorëheqjen e Gramoz Ruçit nga roli i sekretarit të përgjithshëm pas marrjes së rolit të kreut të kuvendit, Kryeministri Rama propozoi Taulant Ballën për të zënë vendin e numrit dy të partisë.

Këtë post, Balla e mbajti për 4 vitet e qeverisë Rama 2 që shënoi edhe kulmin e karrierës politike të Ballës përgjatë të cilit mbajti rolin e sekretarit të përgjithshëm, kreut të grupit parlamentar socialist, si dhe kryetarit të delegacionit në Parlamentin Europian.

Tashmë, Balla do të ketë vetëm rolin e kreut të grupit parlamentar socialist dhe do të drejtojë Partinë Socialiste për qarkun e Fierit.

LEXONI GJITHASHTU: 

• Kush janë ministrat e rinj në qeverinë Rama 3
• Drejtuesit e rinj të Partisë Socialiste në qarqe