Kosovë, 90% të pacientëve në Mjekësinë Sportive po trajtohen me oksigjeno-terapi

Klinika e Mjekësisë Sportive vazhdon të jetë e ngarkuar me pacientë të infektuar me virusin vdekjeprurës të COVID-19. Aktualisht në Klinikën Infektive ll po marrin trajtim mjekësor 109 pacientë.

Në përgjithësi gjendja e të shtrirëve është e qëndrueshme, përveç 10 pacientëve që kanë simptoma  më të rëndë shëndetësore.

Por edhe në këtë klinikë COVID ka shumë pak persona që janë të vaksinuar kundër pandemisë. Kështu ka bërë të ditur për KosovaPress, menaxheri i Mjekësisë Sportive, Artan Ahmeti, i cili tha se aktualisht në Infektiven ll janë të lirë edhe 60 shtretër që i takojnë hapësirës së re së destinuar për pacientët me COVID.

Ahmeti njoftoi se mbi 90 për qind e të shtruarve në këtë klinikë po trajtohen me oksigjeno-terapi.

“Ata që janë më të rëndë jemi në kontakt të vazhdueshëm me anesteziolog dhe varësisht nga parametrat klinikë ata pritet të transferohen në mjekimin intensiv qendror COVID… Mbi 90 % janë me oksigjen-oterapi”, tha Ahmeti.

Gjithashtu edhe në Mjekësinë Sportive pranë QKUK-së numri i pacientëve të vaksinuar nuk është i madh, por specialistët thonë se ata që kanë marrë vaksinën po e kalojnë më lehtë variantin “Delta”.

“Pacienti që ka marrë një ose dy doza mund të ketë edhe shumë sëmundje shoqëruese që ndoshta COVID-i është një përkeqësim i situatës, por jo shkaktar i vdekjes”, u shpreh Ahmeti.

Ahmeti ka ritheksuar se trajtim spitalor si pasojë e infektimit me variantin delta po vazhdojnë të kërkojnë edhe shumë të rinj, por ka dhe mosha të vjetra.

Kosova në 24 orë raportoi 32 vdekje si pasojë e COVID-19, ndërkohë që janë regjistruar edhe 1.612 raste pozitive.