Mbi 90% e ujdisë së Uashingtonit mes Kosovës e Serbisë kanë mbetur në letër

Përveç njohjes së Kosovës nga Izraeli dhe studimit të fizibilitetit për liqenin e Ujmanit, pikat tjera të kësaj marrëveshje kanë mbetur në letër.

E gjithë kjo, pasi qeveria aktuale në krye me Albin Kurtin nuk pajtohet me këtë marrëveshje dhe konsiderohet e paligjshme. Por për Avdullah Hotin, kjo marrëveshje është fuqiplotë.

“Si mund të nënshkruhen një marrëveshje në Shtëpinë e Bardhë e të mos jenë fuqiplotë?  Marrëveshja e 4 shtatorit 2020 është e rëndësisë strategjike për shtetin e Kosovë. Ajo e forcon partneritetin strategjik Kosovë-SHBA dhe siguron përfshirje të drejtpërdrejt të SHBA-ve në konsolidimin e shtetësisë së Kosovës në rajon dhe ndërkombëtarisht”,thekson ish-kryeministri.

Ndërkohë, duket se edhe qëndrimi i VV karshi kësaj ujdie është zbutur. Sipas deputetit të kësaj partie, Haki Abazi, shumica e zotimeve te 4 shtatorit në Uashington flasin për marrëdhëniet qe Kosova duhet t’i ketë me SHBA, duke mos e përfshirë aspak Serbinë.

“Sigurisht shumica e zotimeve janë po ashtu çështje bilaterale ndërmjet Kosovës dhe SHBA dhe do te vazhdojmë të bisedojmë me administratën Biden për forcimin e këtij lloj bashkëpunimi strategjik”, thotë ai.

Por, për Hotin zbatimi në tërësi i kësaj marrëveshje është e domosdoshme, pasi sipas tij, Kosova humb nëse nuk e bën një gjë të tillë.

“Ata që e kundërshtojnë nuk e duan një rajon të qetë dhe të integruar në familjen e kombeve demokratike perëndimore. Moszbatimi i kësaj marrëveshje i humb Kosovës miliona investime në infrastrukturë, energji dhe financim të bizneseve, si dhe e lëkund partneritetin tonë me SHBA-të”, shton Hoti.

Përpos marrëveshjes, Abazi thotë se Serbia vijon të lobojë në heshtje kundër Kosovës.

“Deklaratat e fundit te presidentit Vuçiç përveç se janë brengosëse, nuk janë befasuese fare, sepse e dimë që Serbia përkundër atyre zotimeve ka vazhduar të bëjë lobin e saj kundër Kosovës, sepse e ka qellim strategjik qe mos të lejojë progresin e saj.”, thekson Abazi.

Disa nga pikat e marrëveshjes janë në disfavor të Kosovës sipas analistit Halil Matoshi.

“Amerikanët po e trajtojnë si të mirëqenë atë marrëveshje, por pala kosovare ka humbur shumë kohë vetëm duke e kritikuar sidomos qeveria aktuale nuk ka gjetur mënyrë apo formë për ta trajtuar me palën amerikane, thjesht me negocim dhe me e dhënë mendimin e vet se për cilat pjesë të marrëveshjes pajtohet e për cilat jo. Sepse çështja e minishengenit është marrëveshje, e cila e degradon pavarësinë e Kosovës, sepse ende nuk njihet nga Serbia dhe aty shkon si palë e pabarabartë, ndërsa pjesët tjera janë në favor të Kosovës pa asnjë dyshim.”, thotë ai.

Në këtë marrëveshje të nënshkruar në Shtëpinë e bardhe, parashihej edhe moratoriumi 1-vjeçar për mos aplikim për anëtarësim të Kosovës në organizata ndërkombëtare, ndaljen e lobimit të Serbisë kundër Kosovës, shfrytëzimin e përbashkët të liqenit të Ujmanit, krijimi i lidhjeve mes dy vendeve përmes autostradës e hekurudhave, përfitimet financiare nga Korporata Ndërkombëtare të SHBA-së për Zhvillim Financiar, njohja e diplomave e disa pika të tjera.

LEXONI GJITHASHTU:

• Dialogu Kosovë-Serbi, çfarë prodhuan dy takimet e Albin Kurtit me Aleksandër Vuçiç?
• Çfarë u nënshkrua në Uashington, Euronews Albania zbulon marrëveshjen Kosovë-Serbi
• Haradinaj nuk mbështet marrëveshjen në SHBA, kërcënon me largim nga qeveria
• “Ujmani dhe mini-shengeni”, Hoti sqaron pikat e nxehta të marrëveshjes në Uashington