Të rinjtë t’i drejtohen tregut me formim specifik ose nuk do të punësohen, thotë eksperti

Eksperti i punësimit, Erion Muça tha në Euronews Albania se mënyra e vetme që të rinjtë e diplomuar të gjejnë hapësirat e nevojshme në tregun e punës është që t’i drejtohen atij me një formim specifik.

Sipas tij, është momenti që të studiohet se si po ndryshon tregu në mënyrë që secili profesionist të specializohet në një fushë më të ngushtë, përtej njohurve të përgjithshme të profesionit për të cilin është diplomuar.

“Pra, gjithë interesi kanalizohet në një segment të ngushtë. Sot duhet t’i drejtohemi tregut me formim specifik, me formim të veçantë jo me atë të përgjithshëm”, tha ai.

Z. Muça tha se aktualisht tregu ka më shumë nevojë për specialistë të teknologjisë së informacionit, por edhe ata që mbarojnë profesionet tradicionale sipas ekspertit duhet të specializohen në një fushë më të ngushtë në mënyrë që të integrohen në treg.

Mungesa e përputhshmërisë mes kërkesë-ofertës në tregun shqiptar të punës, tha eksperti i pengon të gjithë ata që diplomohen që të gjejnë hapësirat e nevojshme.

LEXONI GJITHASHTU:

• Infermierët drejt Gjermanisë, rriten kërkesat për gjuhën gjermane
• Niveli më i ulët i biznesit që nga 2012, thotë Dhoma Amerikane e Tregtisë