Rama apel studentëve dhe pedagogëve: Vaksinimi domosdoshmëri për t’u ulur në auditorë

Kryeministri Edi Rama ka deklaruar se në auditorë nuk do të futet asnjë student, mësues, pedagog, apo stafi i administratës që janë të pavaksiuar.

“Në auditorë do të hyjnë ata që vaksinohen. Sepse nuk ka mundësi që pjesa që është e vetëdijshme që do të mbrohet, të kërcënohet nga ata që jetojnë me teoritë e konspiracionit, apo që jetojnë me frikëra që janë komplet antishkencore, të pabazuara, të pajustifikueshme. Natyrisht që askush nuk i merr dot me forcë dhe s’ka ndërmend t’i marrë me forcë askund, por në mjedise ku janë të tjerët je i detyruar të vaksinohesh. E njëjta gjë vlen për mësuesit, e njëjta gjë vlen për administratën”, u shpreh kryeministri Rama.

Ndërsa, ministrja e Shëndetësisë, Ogerta Manastirliu tha se gjatë muajit të hapur të vaksinimit ka një rritje të interesit nga të rinjtë, duke theksuar se plani i vaksinimit do të vijojë edhe në universitete apo konvikte.

“Në auditorë, në universitete dhe konvikte ne jemi duke përgatitur grupet e vaksinimit për t’ju dhënë mundësinë që edhe nëse nuk vijnë dot në qendër shëndetësore, të mund të vaksinohen në konvikt apo pranë universitetit”, nënvizoi Manastirliu.

Teksa foli për certifikatën e vaksinimit, Manastirliu tha se së shpejti do të integrohen të dhënat në sistemin e Bashkimit Europian për njohjen e pasaportës së vaksinimit.

LEXONI GJITHASHTU:

• Certifikatë vaksinimi ose test negativ, kushtet për të udhëtuar drejt Gjermanisë
• Certifikatë vaksinimi ose test negativ, kushtet për të udhëtuar drejt Italisë