Teatri Metropol çel sezonin me dramën për komunizmin ‘Kapter Behari’

Të flasësh për komunizmin duket se asnjëherë nuk është e mjaftueshëm, dhe se skutat e një regjimi të gjatë, të egër, kanë nevojë të njihen të eksplorohen e të rrëfehen. “Kapter Behari” drama e autorit dhe regjisorit Stefan Çapaliku , sjell jetët paralele të asaj kohe.

“Ekziston në shoqërinë tonë njëfarë shpotie kur u thua që po merresh me periudhën e komunizmit, thonë ‘hë more ti akoma të merresh me këtë punë?’… detyra jonë si artistë është ta eksplorojmë origjinën e kësaj problematike, qofshin këto në komunizëm apo më tej, sepse historia nuk ka asnjë pikë fillimi,” – tha Çapaliku.

Drama ngrihet në Burrel, mes tre personazheve, Kapter Beharit që luhet nga Ervin Bejleri, Pjetri i burgosuri veteran që vihet në skenë nga Naum Shundi, dhe Liza, banakierja e klubit të qytetit.

Kapter Behari, përgjegjësi për mbarëvajtjen e agjitpropit, çdo ditë i lexon të burgosurve politikë librat e Enver Hoxhës. Pjetri 25 vite të jetës i kalon në burg, ku herë pas here i ngarkojnë edhe detyrën e përkthyesit të teksteve sekrete.

“I falënderoj në publik Ervin Bejlerin, një aktor që mendoj se është në kulmin e karrierës së tij… roli i Pjetrit besoj se ky rol e pasuron tërë galerinë e roleve të karrierës së Naum Shundit,” – tha Çapaliku.

Megjithëse një entuziazëm mbetet rikthimi i jetës artistike, që prej pandemisë u zhvillua me hope, sa shumë ndikoi kjo tek artisti, tek krijuesi, a ishte një kohë që dëmtoi?

Çapaliku thotë se merita e çdo artisti është që t’i kthejë disfavoret në favore. Sipas tij kjo situatë ka qenë pozitive për artistët pasi i ka bërë ata që të jenë “në më shumë kohë me veten”.

“Kapter Behari” do të ngjitet në skenën e Teatrit Metropol deri më 12 shtator, për t’i dhënë shikuesit një realitet ndoshta të paprovuar, por që me domosdoshmëri duhet të njihet për të kuptuar pasojat që la pas.