PD kryen homazhe në 23-vjetorin e vrasjes së Azem Hajdarit

23 vite më parë u ekzekutua një nga themeluesit e Partisë Demokratike Azem Hajdari, një nga figurat më të rëndësishme të viteve të para të pluralizmit në Shqipëri.

Kryetari i Partisë Demokratike, Lulzim Basha bashkë me disa prej deputetë të tjerë bënë homazhe në memorialin e liderit të lëvizjes studentore.

Basha tha se vepra dhe sakrifica e Azem Hajdarit shërben si model frymëzim kundër dhunës së regjimit shtypës.

“Vepra dhe sakrifica e Azem Hajdarit mbetet model frymëzimi për të mos iu nënshtruar dhunës së regjimit, për të luftuar me vendosmërinë e heroit të demokracisë dhe për të çuar deri në fund idealin e Shqipërisë si gjithë Europa”, shkroi Basha.

Kreu i PD-së thotë se emri i Azem Hajdarit është simbol bashkimi për demokratët, sidomos në rrethanat aktuale që siç thotë ai “fatet e demokracisë janë të pasigurta dhe perspektiva  europiane e Shqipërisë po kërcënohet nga korrupsioni dhe regjimi i pakicës”.

Udhëheqës i Lëvizjes Studentore të dhjetorit 1990, Azem Hajdari me rezistencë dhe mbështeje të gjerë arriti të përmbysë regjimin komunist në Shqipëri, ndërsa i hapi rrugë vendosjes së pluralizmit politik.

Ai ishte gjithashtu një nga themeluesit e Partisë Demokratike të Shqipërisë dhe njëherësh kryetar i Komisionit Nismëtar të kësaj partie. Azem Hajdari mbajti postin e deputetit në radhët e Partisë Demokratike të Shqipërisë që nga viti 1991 e deri sa u vra, më 12 shtator të vitit 1998.