Nënkryetari i Shoqatës së Ndërtuesve: S’mund të përgjigjemi tërë jetën për një ashensor, përgjegjësia mbi banorët

Arben Dervishi, nënkryetar i Shoqatës së Ndërtuesve u shpreh për Euronews Albania se një ndërtues nuk mund të përgjigjet gjithë jetën për gjendjen në të cilën ndodhet ashensori i instaluar në një objekt.

“Nuk mund të përgjigjet ndërtuesi tërë jetën për një ashensor ose të mbajë përgjegjësi inspektorati nëse vetë banorët nuk e mirëmbajnë ashensorin”, tha ai, teksa shtoi se përgjegjësia është në radhë të parë e banorëve, pasi duhet të bëjnë pagesat për mirëmbajtjen e tyre.

Ai theksoi se pas përfundimit të një pallati bëhet kolaudimi i objektit, i cili i kalon bashkisë për të marrë lejen shfrytëzimit.

“Në këtë rast mund të hyjnë edhe inspektoratet, të cilët përpara se të jepet leja duhet të kolaudojnë këto pajisje”, tha ai.

Ndërsa, Aurel Backa, importues dhe instalues ashensorësh u shpreh se ashensorëve duhet t’u bëhen herë pas herë kontrolle, në mënyrë që të parandalohen aksidentet.

“Ashensorëve për një periudhë 5-vjeçare duhet bërë një remont pjesor, në një përudhë 10-vjeçare një remont total. Duhen bërë kontrolle herë pas herë që të hiqet pjesa e dëmtuar para shkaktimit të një aksidenti”, u shpreh ai, teksa shtoi se Inspektorati Shtetëror i Mbikëqyrjes së Tregut nuk e di sesa ashensorë ka në qarkullim.

Backa shtoi se vitet e fundit ka hyrë mall i pakontrolluar në Shqipëri dhe se në treg diskutohet çmimi i blerjes së një ashensori para cilësisë.

LEXONI GJITHASHTU:

• ISHMT: Ashensori i pallatit në Astir s’është inspektuar, përgjegjësi nuk ka bërë regjistrimin
• Banorët e pallatit në ‘Astir’ thonë se ashensori ka pasur probleme të vazhdueshme
• Shkëputet ashensori në një pallat në “Astir”, plagosen dy gra