A do ketë arrestime të bujshme? Përgjigjet Arben Kraja

Kreu në detyrë i SPAK, Arben Kraja, i pyetur nga Euronews Albania nëse në rrjetën e SPAK do të bjerë ndonjë ‘peshk’ i madh gjatë kohës që ai është në krye të kësaj strukture, tha se po bëhen hetime shumë të rëndësishme.

Në një deklaratë për mediat, pas takimit me prokurorët për zgjedhjen e anëtarit të Këshillit të Lartë të Prokurorisë, Kraja përmendi rastin e sotëm të marrjes të pandehur të 10 ish zyrtarëve të qarkut të Lezhës, përfshirë edhe ish-kryetarin e bashkisë.

“Prokurorët e SPAK punojnë përditë. Sot kishim një njoftim për përfundimin dhe dërgimin për gjykim të një procedimi shumë të rëndësishëm për shkelje me pronat publike, ku është sekuestruar një sasi e jashtëzakonshme sipërfaqe toke e cila do t’i kthehet shtetit”- tha Kraja.

Më tej, ai theksoi se ka indicie që prokurorë e gjyqtarë që hetojnë dosje me personazhe të fuqishëm janë kërcënuar.

Kraja përfundon mandatin në dhjetor, ndërsa në 2 nëntor 2022 përfundon afati për dorëzimin e kandidaturave të tjera për këtë post.

E kur kanë mbetur vetëm pak ditë, ende nuk është paraqitur asnjë kandidaturë për t’u ulur në karrigen që do të lihet bosh nga zoti Kraja.

LEXONI GJITHASHTU:

•  Kraja: Ka indicie që prokurorë e gjyqtarë janë kërcënuar
• Çela: Shqetësuese rastet e abuzimeve me pronat në bregdet, të vijojnë hetimet