A ka marrë Berisha një fletë-thirrje për hetimin e 21 janarit? Përgjigjet Kuçana

Anëtarja e Këshillit Kombëtar të Partisë Demokratike, Ilirjana Kuçana, ka disktuar në “Review” me moderatore Greta Topjana, në lidhje me hetimet e 21 Janarit, ku pjesë e hetimeve është edhe kreu i PD-së, Sali Berisha.

Ish-kryeministri Berisha deklaroi të premten, ditën kur duhej të paraqitej në SPAK, se nuk ka marrë asnjë fletë-thirrje nga Prokuroria e Posaçme për këtë çështje. Ai kundërshtoi deklarimin zyrtar të SPAK, i cili bëri me dije se ndaj tij ishin dërguar dy fletë-thirrje, duke i cilësuar këto pretendime si të pavërteta.

Kuçana theksoi se Berisha nuk është njoftuar zyrtarisht.

“Berishës nuk i ka ardhur një fletë-thirrje. Më 3 janar ka qenë në SPAK dhe, po të kishin qenë të interesuar, do t’ia jepnin aty. Edhe dy javë më pas ka qenë sërish në SPAK. Pas qarkullimit në media se do t’i jepej fletë-thirrje si person në dijeni, ai ka porositur njerëzit me të cilët punon, por as në banesë dhe as në zyrë nuk ka një fletë-thirrje.”

Ajo shtoi se procedura e njoftimit kërkon firmë nga marrësi, ose përndryshe hartimin e një procesverbali nga dy persona në rast refuzimi.

“Në momentin që merret ose nuk merret fletë-thirrja, ka një procedurë ku duhet të firmosin, ose në të kundërt dy persona duhet të mbajnë procesverbal për mosfirmosje.

SPAK të nxjerrë një dokument ku vërtetohet se kjo shkresë ka shkuar për Sali Berishën”, deklaroi Kuçana.